Dëftesa e S&P për Shqipërinë – Keq politika, korrupsioni dhe mbledhja e të ardhurave
Agjencia e vlerësimit të ekonomisë, Standard & Poor’s, ka publikuar dhe dëftesën për qeverisjen dhe ekonominë shqiptare. Në dokumentin që zotëron SCAN tregues si mbledhja e të ardhurave, evazioni fiskal apo nismat politike janë vlerësuar me nota konkrete. Rezultati nuk është optimist.
Veç vlerësimit të notës së borxhit sovran të Shqipërisë “Standard and Poor`s” vlerëson veçanërisht edhe shtyllat kryesore që çojnë në vlerësimin final. Gjithsej janë 6 nota, nga 1-6, me notën 1 që është nota maksimale dhe notën 6, më e dobëta. Ajo e fleksibilitetit dhe performancës fiskale merr notën 3, rrjedhojë e performancës së dobët të qeverisë në mbledhjen e të ardhurave, rrjedhojë dhe e evazionit fiskal apo edhe e ekonomisë së madhe informale, thotë vetë agjencia e vlerësimit të kreditit.
Në drejtim të kornizës institucionale, njëra nga shtyllat e vlerësuara, me notën 5, agjencia thotë se, ka një rrezik të madh për institucionet politike, politikat e së ardhmes janë shumë të vështira për t`u parashikuar, dhe se disa zgjedhje politike mund të dëmtojnë kapacitetin për t`i mbajtur të qëndrueshme financat publike. Nuk është i sigurt zbatimi i kontratave si dhe korrupsioni i perceptuar është në nivele të larta, thuhet më tej. Edhe barra e borxhit, vlerësimi ekonomik, vlerësimi monetar marrin notën 5.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.