Dëftesat dhe diplomat – MAS përcakton kriteret dhe procedurat për nxënësit nga jashtë

Për të gjithë nxënësit e arsimit parauniversitar,  që kanë studiuar jashtë dhe duan t’i  vijojnë studimet e tyre në Shqipëri, Ministria e Arsimit dhe Sportit  ka përcaktuar  kriteret dhe  procedurat e njëvlershmërisë së dëftesave dhe diplomave.

Në bazë të një udhëzimi të fundit, Ministria thekson se njësimi i diplomave do të bëhet nga Qendra e Shërbimeve Arsimore.

Sipas këtij udhëzimi, të interesuarit duhet të dërgojnë në rrugë postare ose të dorëzojnë  në Qendrën e Shërbimeve Arsimore një sërë dokumentesh, ndër të cilat:

• formularin e aplikimit për njëvlershmëri,
• fotokopje të dokumentit të identifikimit të aplikantit,
• si edhe kopjen e përkthyer dhe të njësuar me origjinalin e dëftesave dhe diplomës.

Dokumentat duhet të kenë vulën apostile të shtetit prej nga vijnë.

Nxënësit të cilët duan të vijojnë studimet e tyre në vendin tonë dhe për punësim kanë mundësinë ta bëjnë këtë njëvlershmëri gjatë gjithë vitit.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.