Deklarata e Fed për SHBA: “Rimëkëmbja ekonomike do të varet ndaj kursit të koronavirusit”
Kreu i Rezervës Federale, Jerome Powell, tha se rritja e rasteve me koronavirus në SHBA dhe kufizimet për të përmbajtur infeksionin, kanë nisur të ndikojnë tek rimëkëmbja ekonomike, duke theksuar një rënie të konsumit dhe një ngadalësim të ripunësimit të punëtorëve të larguar përkohësisht. Powell foli pas takimit mujor të politikave monetare të Rezervës Federale. Komentet e tij konfirmuan perspektivën e dobët të rimëkëmbjes ekonomike. Deklarata politike e bankës lidhi në mënyrë direkte rimëkëmbjen ekonomike me zgjidhjen e krizës shëndetësore. Mbi 150,000 amerikanë kanë vdekur nga Covid-19.
“Rrugëtimi i ekonomisë do të varet ndaj kursit të virusit”, deklaroi Komisioni Federal i Tregut të Hapur. Politikëbërësit përsëritën premtimin për të përdorur të gjithë mjetet monetare për të mbështetur ekonominë dhe mbajtur interesat pranë zeros për sa kohë të jetë e nevojshme. Rezerva Federale deklaroi se aktiviteti ekonomik dhe punësimi janë rritur pak nga muajt e kaluar, por qëndrojnë ende shumë poshtë niveleve të para-pandemisë. Të gjithë anëtarët e komisionit votuan për të mbajtur të pandryshuar segmentin e interesave në 0-25%, ku ka qenë që prej 15 Marsit, kur virusi nisi të godasë vendin.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.