Dekriminalizimi, KQZ nis verifikimin e kandidatëve – Celibashi: Emrat në Drejtorinë e Burgjeve. Listat, PS më shumë prurje të reja se PD

Menjëherë pas depozitimit të listave nga ana e subjekteve politikë, Komisioni Qendror i Zgjedhjeve ka nisur verifikimin e emrave pranë Drejtorisë së Përgjithshme të Burgjeve. Lajmi është bërë publik nga Kreu i KQZ Ilirjan Celibashi përmes një postimi në Twitter.

“Menjëherë pas dorëzimit të listave shumë emërore nga subjektet zgjedhore, KQZ ka filluar verifikimin e dokumenteve të kandidimit. Verifikimi i formularëve të vetëdeklarimit (dekriminalizimi) po bëhet në bashkëpunim me Drejtorinë e Burgjeve”, shkruan Celibashi.

Mesnatën e se hënës, Partitë Politike dërguan pranë Komisionit Qendror të Zgjedhjeve listat shumë emërore të kandidatëve,. Duket se do të jetë Partia Socialiste ajo që do ketë nevojë për më shumë verifikime për shkak se lista e saj është ndryshuar në masë më të madhe se 20% krahasuar me atë të vitit 201. Më pak e rifreskuar është Lista e Partisë Demokratike, e cila në masë të konsiderueshme ka mbajtur të njëjtin ekip, qoftë sa u përket kandidatëve të saj, ashtu edhe të aleatëve.

Nga një krahasim i listave aktuale me ato të vitit 2017 vërehet se ekipit të Partisë Socialiste i mungojnë mbi 30 emra të njohur, si ai i Vasilika Hysit, Eglantina Gjermenit apo ish Ministrit Ditmir Bushati. Ndërkohë që në në ekipin e Partisë Demokratike mungojnë rreth 10 emra, mes të cilëve më i spikaturi është ai i ish Ministrit Genc Pollo.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.