Del vendimi zyrtar/ Si do të shtyhet pagesa e qirave për bizneset e vogla, studentët dhe individët e prekur nga masat e pandemisë
Qeveria ka vendosur të ndërhyjë përmes një aktit normativ në pezulllimin e dhënies së qirave për muajt prill dhe maj 2020, për bizneset e vogla, studentët apo individët që kanë mbetur pa punë përkohësisht apo përherë si rrjedhojë e masave për parandalimin e përhapjes së pandemisë.
Vendimi i publikuar në Fletoren Zyrtare parashikon se qiratë do të paguhen nënjë periudhë të dytë, pasi të ketë kaluar situata e emergjencës. Në rast se konstatohen shkelje në këtë drejtim, qiramarrësit kanë të drejtë të ankohen në Drejtorinë e Tatimeve. Por nëse ndodh e kundërta, kur qiramarrësit kanë shkelje, atëhere ata do të gjobiten me 5 fishin e vlerës së qirase.
Çfarë parashikon akti normativ:
-Të gjithë qiramarrësit individë, të cilët kanë kontratë qiraje për banesë apo çdo dokument tjetër që vërteton marrëdhënien kontraktore qiradhënës–qiramarrës, përpara shpalljes së gjendjes së epidemisë, që kanë kontratë pune por e kanë pezulluar/zgjidhur atë si pasojë e gjendjes së shkaktuar nga COVID–19, nuk do ta paguajnë detyrimin e qirasë për dy muaj, prill dhe maj 2020.
-Të gjithë qiramarrësit studentë, të cilët kanë kontratë qiraje për banesë apo çdo dokument tjetër që vërteton marrëdhënien kontraktore qiradhënës–qiramarrës, përpara shpalljes së gjendjes së epidemisë, nuk do ta paguajnë detyrimin e qirasë për dy muaj, prill dhe maj 2020.
-Të gjithë qiramarrësit persona fizikë/juridikë me të ardhura deri në 14 000 000 (katërmbëdhjetë milionë) lekë në vit, të cilët kanë kontratë noteriale qiraje për zhvillimin e aktivitetit të tyre ekonomik, të nënshkruar përpara shpalljes së gjendjes së epidemisë, dhe e kanë ndaluar aktivitetin si pasojë e gjendjes së shkaktuar nga COVID–19, nuk do ta paguajnë detyrimin e qirasë për dy muaj, prill dhe maj 2020.
-Detyrimi i prapambetur i këtyre dy muajve do të paguhet nga qiramarrësi, në mënyrë proporcionale dhe të dakordësuar me qiradhënësin, pas muajit maj 2020. Për ato kontrata që përfundojnë përpara afatit 31 maj 2020, detyrimi i prapambetur do të paguhet nga qiramarrësi brenda tre muajve pas datës 31 maj 2020.
-Të gjithë qiramarrësit e përcaktuar në këtë pikë, të cilët kanë ankesë për qiradhënësin si pasojë e moszbatimit të detyrimeve të mësipërme, do t’I drejtohen Drejtorisë së Përgjithshme të Tatimeve nëpërmjet komunikimit elektronik.
Qiradhënësit, të cilët nuk e zbatojnë këtë pikë, dënohen me gjobë në masën e pesëfishit të qirasë mujore përkatëse.
Ngarkohet Drejtoria e Përgjithshme e Tatimeve për ndjekjen dhe zbatimin e parashikimeve të kësaj pike dhe nxjerrjen e udhëzimeve përkatëse.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.