Delta po përhapet me shpejtësi – Zelanda e Re regjistron rritjen më të lartë të të infektuarve që nga prilli 2020
Zelanda e Re të martën regjistroi rritjen e saj më të lartë në rastet e COVID-19 që nga Prilli 2020. Periudha e qetë në shtetin e Paqësorit Jugor që nga muaji shkurt i këtij viti, përfundoi javën e kaluar pas regjistrimeve të rasteve të para të variantit Delta në Auckland, qyteti më i madh i Zelandës së Re dhe u përhap shpejt në kryeqytetin Ëellington.
Autoritetet raportuan 41 raste të reja me COVID-19 të martën, duke e çuar numrin e përgjithshëm të infeksioneve në vend në 148. Kjo ishte rritja më e madhe e rasteve që nga 10 Prilli 2020, sipas të dhënave nga Ministria e Shëndetësisë. Nga rastet e reja, 38 janë në Auckland dhe tre janë në Ëellington. Deri më tani, tetë persona janë të shtruar në spital. Sipas zyrtarëve, Delta është shumë infektive dhe e transmetueshme dhe siç është vërtetuar përhapet me shpejtësi. Por, deri më sot infektimet nuk po rriten në mënyrë eksponenciale dhe shumica ishin akoma në Auckland.
Kryeministrja Jacinda Ardern ka marrë vlerësime globale për eleminimin e COVID-19 vitin e kaluar. Por mbështetja e saj në kontrolle të rrepta kufitare dhe bllokime të menjëhershme që kanë ndikuar në ekonomi është vënë në pikëpyetje mes shpërthimit të fundit, ndërsa pak njerëz janë vaksinuar. Të hënën, kryeministrja zgjati bllokimin e rreptë kombëtar të nivelit 4 deri më 27 gusht.
Në Australinë fqinje, Kryeministri Scott Morrison, i cili gjithashtu është nën presion në rritje për shtimin e rasteve të COVID-19, tha se eleminimi i koronavisurit nuk mund të vijojë pafundësisht, duke përmendur Zelandën e Re si një shembull.
Sipas tij, të dhënat nga studimet e fundit kanë treguar se vaksinimi i 70-80% i popullsisë frenon ndjeshëm përhapjen e variantit Delta.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.