Dëmet e Fondit të Kompensimit. Kuvendi kërkon nga AMF të raportojë çdo katër muaj
Kuvendi i Shqipërisë i kërkon Autoritetit të Mbikëqyrjes Financiare të raportojë çdo katër muaj lidhet me ecurinë e shlyerjes së dëmeve që janë objekt i fondit të kompensimit. Në rezolutën për vlerësimin e veprimtarisë së institucionit gjatë vitit 2019, Kuvendi i ka lënë AMF-së për detyrë të kryejë periodikisht inspektime në shoqëritë e sigurimit dhe në Byronë Shqiptare të Sigurimeve për këtë kategori të dëmeve. Mes të tjerash, kërkohet verifikimi i saktësisë së të dhënave të raportuara dhe korrektësinë në kryerjen e pagesave, si edhe monitorimi me një kujdes të veçantë i shlyerjes së detyrimeve të prapambetura. Fondi i Kompensimit ka detyrimin ligjor të paguajë dëmet e shkaktuara nga mjetet e pasiguruara ose nga ato të paidentifikuara.
Mbështetur në të dhënat e raportuara nga AMF, pagesa e dëmeve që janë objekt i këtij fondi është përmirësuar ndjeshëm. Edhe falë trysnisë së fortë të ushtruar nga Kuvendi në vitet e fundit, u arrit që fondi i kompensimit të shlyente shumicën e detyrimeve të bartura ndër vite ndaj të dëmtuarve. Sipas AMF-së, vitin e kaluar Fondi i Kompensimit të Byrosë Shqiptare të Sigurimeve pagoi rreth pesë milionë euro dëme, ndërsa në tre vitet e fundit, vlerësohet se shuma totale e dëmeve të paguara nga ky fond arriti në pothuajse 19 milionë euro.
Rezoluta e Kuvendit kërkon gjithashtu që AMF të sigurohet që faqja e internetit e Byrosë Shqiptare të Sigurimit të përditësohet periodikisht, me informacion të plotë dhe lehtësisht të kuptueshëm për konsumatorët.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.