Dëmet e luftës tregtare – Trump premton ndihma për fermerët. Do të paguajë Kina
Presidenti i Shteteve të Bashkuara, Donald Trump, prezantoi një plan të administratës së tij për t’i ofruar fermerëve të vendit një paketë të ndihmave, që synon të minimizojë efektet e luftës tregtare me Kinën. Trump parashikoi gjithashtu një fund të shpejtë të konflikteve me Kinën, pavarësisht se nuk janë planifikuar bisedime të nivelit të lartë mes 2 vendeve që kur raundi i fundit dështoi përpara 2 javësh.
“Sot po lajmëroj se i kam kërkuar sekretarit të bujqësisë Sonny Perdue, që të ofrojë 16 miliardë dollarë në asistencë për fermerët amerikanë. E gjithë kjo vjen nga Kina. Në do të fitojmë qindra miliardë dollarë nga tarifat ndaj kinës dhe do të ndihmojmë fermerët tanë. Shpresoj që në të ardhmen e afërt të biem dakord me Kinën, por edhe nëse nuk ndodh, ne do jemi për bukuri,” deklaroi Trump.
Presidenti i bëri komentet në një konferencë në Shtëpinë e Bardhë ku merrnin pjesë fermerë, që kanë pësuar humbje nga lufta tregtare. Trump shtoi se do të takojë presidentin kinez Xi Jinping në samitin e G20 muajin e ardhshëm në Japoni. Të dy kanë fajësuar njëri-tjetrin për dështimin e negociatave, që synonin të përfundonin luftën tregtare mes 2 ekonomive më të mëdha në botë. Pasi Trump vendosi tarifa ndaj mallrave kinezë vitin e kaluar, Kina ka ndaluar blerjet e sojës amerikane, duke shtuar inventarët e fermerëve në SHBA. Kina është kundërpërgjigjur gjithashtu me tarifa ndaj grurit, mishit të derrit dhe produkteve të tjera amerikane.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.