Dëmet në sigurime – AMF saktëson afatet në rregulloren për trajtimin e tyre
Autoriteti i Mbikëqyrjes Financiare ka miratuar disa ndryshime në rregulloren për trajtimin e dëmeve që mbulohen nga kontratat e sigurimit të detyrueshëm motorik.
Rregullorja saktëson se kompania e sigurimit duhet të paguajë dëmin brenda 14 ditëve nga përfundimi i afatit për trajtimin e kërkesës nga i dëmtuari dhe nënshkrimit të deklaratës së pranimit të dëmshpërblimit. Në rast të mosrespektimit të këtij afati, të siguruarit i lind e drejta të përfitojë interes për çdo ditë vonesë në pagesën e dëmit.
Ndryshimet do të hyjnë në fuqi nga data 1 korrik dhe i vendosin kompanive të sigurimit një afat prej tetë ditësh për të informuar të siguruarin, në rastet kur dokumentacioni i paraqitur prej tij nuk është i plotë.
Rregullorja gjithashtu ka zgjeruar kanalet e komunikimit, përmes të cilave kompania njofton përfituesit e kërkesës për dëmshpërblim. Veç komunikimit me letër, kompania e sigurimit duhet ta njoftojë të siguruarin edhe përmes postës elektronike ose mesazheve të shkruara në celular, në rastet kur kërkuesi i ka ofruar këto të dhëna në dokumentin e paraqitur pranë kompanisë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.