Dëmet në sigurime-Pësuan rënie për 11 muajt e vitit 2019
Kompanitë e sigurimeve paguan më pak dëme gjatë vitit 2019. Të dhënat e muajit nëntor treguan se për 11 muaj totali i dëmeve të paguara nga siguruesit zbriti në 4.75 miliardë lekë, rreth 7% më pak krahasuar me të njëjtën periudhë të vitit 2018.
Duket se tërmeti i shtatorit nuk ka dhënë ndonjë efekt të ndjeshëm, ndërsa reflektimi i pasojave të tërmetit të nëntorit në statistikat e dëmeve do të kërkojë më shumë kohë.
Sipas të dhënave nga Shoqata e Siguruesve, tërmeti i muajit shtator shkaktoi rreth 4 milionë euro dëme, ndërsa ai i muajit nëntor rreth 12 milionë euro nga konstatimet e para, por kjo shifër është e destinuar të rritet.
Po të shohim statistikat e dëmeve në klasën e sigurimit ndaj fatkeqësive natyrore, deri në fund të nëntorit, në fakt, pagesat e dëmeve kanë qenë ndjeshëm më të ulëta krahasuar me vitin 2018.
Siguruesit kanë paguar vetëm 417 milionë lekë dëme, në rënie me 71% krahasuar me të njëjtën periudhë të vitit 2018.
Përgjithësisht dëmet që mund të ndodhin nga katastrofat risigurohen te kompanitë e mëdha të këtyre shërbimeve.
Megjithatë, shifrat e dëmeve për 11 muajt e vitit 2019 dëshmojnë se të paktën efekti i tërmetit të muajit shtator ka qenë i papërfillshëm për tregun e sigurimeve në Shqipëri.
Struktura e dëmeve vazhdon të dominohet nga sigurimet e detyrueshme motorrike, që përbëjnë rreth 54% të dëmeve të paguara nga kompanitë shqiptare të sigurimeve.
Për 11 muaj, vlera totale e dëmeve të paguara për përgjegjësitë motorrike ndaj palëve të treta arriti në rreth 20 milionë euro.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.