Dëmet nga përmbytjet – Xhafaj në terren, përballet me reagimin e qytetarëve
Pas pastrimit të një pjesë të përmbytur të autostradës Tiranë-Durrës, nga makinat e bllokuara, ministrit të Brendshëm, Fatmir Xhafaj iu desh të përballej me reagimin e përfaqësuesve të bizneseve të kësaj zone. Sipas tyre, në zonën e Vorës pas përmbytjes së investimeve asnjë nga institucionet shtetërore nuk iu përgjigjet për situatën, teksa kjo gjendje përsëritet vit pas viti.
“Siç e shikoni dhe ju, policët i kemi të gjithë në dispozicion. Mund të them një fakt që e gjithë Policia është në situatë të jashtëzakonshme. Që nga mbrëmja e djeshme e gjithë Policia është në krye të detyrës.
Ne, siç e shihni kemi vënë në dispozicion karoatrecët, ato mundësi që kemi, që t’i lëvizim. Kemi biseduar dhe me Drejtorin dhe shefin e qarkullimit që së pari njëherë të jemi shumë të kujdesshëm, që të paktën ato që i ka dëmtuar natyra, mos të dëmtohen nga faktorë të tjerë të jashtëm dhe të jenë në prezencë vetë drejtuesit e mjeteve mundësisht. Dhe nëse edhe kur nuk janë në prezencë, të ketë mundësi policia nëpërmjet karoatrecëve t’i sistemojë diku”, u shpreh Xhafaj.
Pas reshjeve të dendura që ranë mbrëmjen e kaluar aksi Qafë-Kashar –Vore u bë e pakalueshme. Ndërkohë Policia e Tiranës me karroatrec te Policisë Rrugore u erdhën në ndihmë drejtueseve të mjeteve që kanë mbetur të bllokuar në rrugë. Firma e mirëmbajtjes së rrugëve po pastron baltën dhe inertet si pasojë e reshjeve të shiut.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.