Dëmet pezull në sigurime – Janë rreth 58 milionë euro, në rritje vjetore me 39%

Dëmet pezull të kompanive të sigurimeve ngelen në nivele mjaft të larta. Të dhënat nga Autoriteti i Mbikëqyrjes Financiare tregojnë se vlera e këtyre dëmeve është ndjeshëm më e lartë krahasuar me vitin e kaluar, megjithëse tendenca e tyre është në rënie që nga fillimi i vitit. Statistikat tregojnë se dëmet pezull kanë vlerën e 7.2 miliardë lekëve ose rreth 58 milionë eurove. Kjo shumë është 39% krahasuar me të njëjtën periudhë të vitit të kaluar. Megjithatë, që nga fillimi i vitit 2020, stoku i dëmeve të ngelur pezull është ulur me 12%.

Tërmeti i nëntorit 2019 solli një vlerë të lartë dëmesh njëherësh, çka solli në mënyrë të paevitueshme një rritje të ndjeshme të treguesit të dëmeve pezull. Sipas AMF-së, kërkesat për dëmshpërblim si rezultat i tërmeteve të vitit të kaluar prekën vlerën e 4.3 miliardë lekëve ose pothuajse 35 milionë eurove, ndërsa statistikat tregojnë se kompanitë e sigurimeve kanë paguar deri tani afërsisht gjysmën e kësaj shume. Megjithatë, në pjesën dërrmuese fatura e dëmeve do të paguhet nga risiguruesit dhe përllogaritet se siguruesit shqiptarë do të paguajnë afërsisht 10% të totalit.

Dëmet pezull përfshijnë ato në proces vlerësimi, dëmet e miratuara, por të papaguara, si edhe dëmet që janë objekt i çështjeve gjyqësore. Aktualisht, janë mbi 10 mijë të siguruar që prezin të zhdëmtohen nga kompanitë e sigurimit të jo-jetës për dëmet e ndodhura.

Ersuin Shehu / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.