Depozita e gazit në Dumre – Gati VNMS-ja/Punimet parashikohet të nisin në 2023-in, ulje e kostos së furnizimit me gaz 

Punimet për ndërtimin e Depozitës Nëntokësore të Gazit në Dumre parashikohet të nisin në vitin 2023 e të përfundojnë tërësisht në vitin 2029. Kjo sipas Vlerësimit të Ndikimit në Mjedis dhe Social, që është nxjerrë për konsultim publik nga Ministria e Infrastrukturës dhe Energjisë. Sipas dokumentit, depozita nëntokësore e gazit mundëson uljen e kostos së përgjithshme të furnizimit me gaz për konsumatorët fundorë nëpërmjet ofrimit të shërbimeve shtesë në tregjet e gazit, si fleksibiliteti i ofertës dhe kërkesës, dhe krijimi i mundësive përkatëse të tregtimit. VNMS-ja specifikon se i gjithë gazi për konsum në të ardhmen në Shqipëri do të furnizohet nga Gazsjellësi Trans Adriatik  dhe Gazsjellësi Adriatiko-Jonian.

Ndërkohë që, DNG Dumrea synon të përmirësojë dhe lehtësojë furnizimin me gaz në Shqipëri, dhe mundësisht në vendet e rajonit për të mbuluar pikun e kërkesave, për të balancuar ndryshimet sezonale dhe për të ndërlidhur furnizimin me gaz të vendeve të Ballkanit nga Lindja e Mesme dhe Rajoni i Kaspikut. Sipas dokumentit, nëpërmjet lidhjes së DNG Dumrea në rrjetet rajonale të gazit, si TAP dhe IAP, Shqipëria mund të sigurojë struktura rajonale depozituese për vendet fqinje.

Ndërkohë që, sektori energjetik shqiptar do të përfitonte nga shtimi i një kapaciteti prodhimi jashtë pikut që do të ishte i disponueshëm me kërkesë, për të plotësuar prodhimin hidrik gjatë periudhave të kushteve të pafavorshme hidrologjike. Sa i takon kapacitetit, dokumenti saktëson se për depozitën vendore ekziston mundësia për rritjen e kapacitetit, ndërsa për depozitën rajonale kapaciteti maksimal i kërkuar i injektimit është 113,000 m3/orë, ndërsa sasia maksimale e kërkuar e marrjes së gazit është 190,000 m3/orë.  Kjo depozitë do të ndërtohet në një zonë në lindje të fshatit Vlashuk, të Bashkisë Kuçovë, ndërkohë që pika e lidhjes me tubacionin e TAP do të jetë stacioni i valvulave të bllokimit në zonën e Urës Vajgurore, me një tubacion lidhës afërsisht 14.5 km.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.