Depozita e mbetjeve në Porto Romano – Rama: Do të transformohet në një park të madh për Durrësin
Vendgrumbullimi i mbetjeve të Porto Romanos do të transformohet nga një vatër emergjence mjedisore, në një park të madh për Durrësin. Deklarata ka ardhur nga kryeministri, Edi Rama, në një komunikim për mediat pas mbledhjes së Këshillit të Ministrave në Durrës.
Sipas tij, trajtimi i mbetjeve në këtë zonë është një projekt që po diskutohet në bashkëpunim me Fondin Shqiptar të Zhvillimit si dhe Bashkinë e Durrësit, e cila do të luajë edhe rolin e kontributorit.
“Ajo që në kemi si objekti është që ta transformojmë atë zonë nga një vatër emergjence mjedisore në një park për Durrësin që duam dhe për Shqipërinë që duam. Jemi në proces të një studimi të një projekti ku do të përfshijmë si bashkëpunëtor bashkinë dhe si kontributor. Duam ta çlirojmë Durrësin dhe ta transformojmë atë zonë duke krijuar një tjetër rrugë për mbledhjen dhe përpunimin e mbetjeve”, tha Rama.
Ndërkohë, shtoi më tej se deri në vjeshtën e vitit të ardhshëm do të kemi një variant të projektit ose një realizim konkret të tij.
Duke sjellë në vëmendje investimin që po bëhet në Tiranë për trajtimin e mbetjeve, Rama tha se ai duhet të përmbledhë disa bashki, pasi sipas tij vendi nuk e ka luksin të ndërtojë nga një impiant të tillë për secilën prej tyre.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.