Depozita për menaxhimin e mbetjeve – Projektligji, në pritje të legjislaturës së re
Projektligji “Për menaxhimin e integruar të mbetjeve”, vazhdon të mbetet peng i Kuvendit. Një projektligj që erdhi si nevojë e papërgjegjshmërisë së aktorëve të përfshirë në proces çoi në një tjetër atë “Për sistemin e depozitës për menaxhimin e mbetjeve në Republikën e Shqipërisë”, si e vetmja zgjidhje për të siguruar kthyeshmërinë e mbetjeve.
Projektligji vendos rregullat e përgjithshme të funksionimit dhe zbatimit të sistemit të depozitës për menaxhimin e mbetjeve në Republikën e Shqipërisë. Funksionimi i sistemimit është parashikuar të realizohet me anë të futjes së nocionit të depozitës në formën e një vlere monetare të vendosur mbi vlerën e produkteve përpara hedhjes së tyre në treg.
Kjo vlerë që do t’i shtohet produktit, do të paguhet në përfundim të procesit nga konsumatori, por ajo do t’i kthehet këtij të fundit me kthimin e mbetjes objekt i ligjit, në kushtet e përcaktuara nga ky ligj dhe nga aktet ligjore e nënligjore të dala në zbatim të tij. Ky projektligj është propozuar që në 9 shkurt të 2015 por ende nuk ka marrë votat e shumicës që të hyj në fuqi. Projektligji ka si qëllim që të rregullojë situatën e menaxhimit të integruar të mbetjeve në vend dhe si rrjedhojë parashikon dhe një sërë penalizimesh.
Kështu çdo subjekt që tregton/importon produkte pa u vendosur atyre shenjën dalluese të sigurisë, dënohet me gjobë në vlerën një milion lekë. Çdo person që ka në administrim një pikë grumbullimi të mbetjeve, i cili nuk i kthen konsumatorit vlerën e depozitës, kur mbetja e dorëzuar është në përputhje me kërkesat e këtij ligji, dënohet me gjobë pesëdhjetë mijë lekë.
Çdo person që hedh në treg produkte, objekt të këtij ligji, me shenjën dalluese të sigurisë joautentike dënohet me gjobë njëqind mijë. Çdo person që prodhon, shpërndan, shet shenja dalluese të sigurisë së depozitës, me qëllim hedhjen në treg të produkteve objekt të këtij ligji dënohet me gjobë një milion lekë. Por të gjitha këto sanksione duhet që të presin legjistraturën e re e cila do ti marrë në shqyrtim ndërkohë që menaxhimi i mbetjeve do të vazhdojë në po të njëjtën mënyrë që është bërë edhe dy vite më parë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.