Deri në 2029 do të hiqet tatim-fitimi dhe TVSH-ja për biznesin e vogël, Rama: “Thirrje emigrantëve të kthehen”
Ashtu siç edhe ministri i Rindërtimit, Arben Ahmetaj ka njoftuar pak kohë më parë se në Planin Kombëtar “Shqipëria 2030”, tatim-fitimi për bizneset do të ishte në 0%, lajmin e ka konfirmuar përsëri kryeministri Rama në konferencën për shtyp për sigurimin e eurobondit 650 mln euro.
“Ne në parlament do të çojmë rishikimin e buxhetit dhe do të rishikojmë paketën fiskale për biznesin e vogël duke i hequr tatim fitimin, dhe jo për fushatë me fjalë, por me ligj. Jo për këtë vit, por deri në 2029, nuk do të kenë tatim fitimi.
Gjithashtu kryeministri lajmëroi se së bashku me ministrin Ahmetaj është duke parë edhe mundësinë e heqjes së TVSH-së, ndërkohë që eurobondi ishte një pikë kyçe për të vazhduar me zbatimin e këtyre masave ekonomike:
“Ministri ka sqaruar se jemi duke parë edhe TVSH-në. Me këtë rezultat të djeshëm, është e sigurt se ne do u heqim edhe TVSH-në, afatet dhe limitet do i konfirmojmë më tutje, deri në cilin nivel xhiroje. Qëllimi është deri në 2029 të mos kenë as tatim fitimi as TVSH për biznesin e vogël.”
Kryeministri më tej i ka bërë thirrje emigrantëve shqiptarë që të kthehen në vend dhe të shohin mundësinë e fillimit të një biznesi të vogël, me masat e reja që po zbatohen duke shtuar se projektet e agroturizmit do të jenë 100% pa taksa:
“Të gjithë ata emigrantë, ta shikojnë Shqipërinë për të hapur një biznes të vogël për të ardhur dhe për të jetuar me familjen, më mirë sesa nga rropatja në emigracion. Të gjitha projektet në agroturizëm të jenë 100% pa taksa, nuk diskutoj tarifat vendore, as sigurimet shoqërore.”
Të vijnë të bëjnë atë që kanë bërë shumë emigrantë të marrin shtëpitë e gjyshit dhe stërgjyshit, të nxjerrin më shumë të ardhura se në Gjermani apo ku janë. Brenda këtij sesioni biznesit të vogël ti themi nuk ke taksa, zero TVSH, je në pozicionin që respektohesh për punën dhe aleat i shtetit për të mbajtur kontrollin mbi biznesin e madh, që të voglin e përdor për evazion. Nuk do të ketë më inspektorë të dera. Njerëz të lirë. Nuk e ka asnjë vend. Të gjitha ata me biznes të vogël” tha Rama.
Më tej kryeministri Rama shtoi se humbja e që pëson shteti me tatim-fitimin dhe TVSH që i hiqet biznesit të vogël është e konsiderueshme, por për të nuk cilësohet humbje pasi fitojnë shqiptarët. Rama tha se heqja e taksës nuk do të thotë nxjerrje të biznesit të vogël nga sistemi por rregullim i sistemit, hapi i parë i fiskalizimit dhe dixhitalizimit të gjithë marrëdhënieve dhe transaksioneve do të jetë biznes-biznes dhe jo qytetar biznesi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.