“Dështon” hetimi për tregun e barnave – AK shtyn afatin: Subjektet dhe institucionet shtetërore s’japin informacion të saktë

Subjektet që operojnë në tregun e barnave dhe pajisjeve mjekësore, si dhe insittucionet shtetërore për mbikqëyrjen e tyre nuk kanë dhënë informacion të saktë dhe të plotë pranë Autoritetit të Konkurrencës, pas një hetimi të tregut që u hap nga ky dikaster në muajin shtator të vitit të kaluar.  Sipas AK-së, gjatë periudhës së realizimit të procedurës hetimore, Sekretariati u has me vështirësi në mbledhjen e informacionit dhe të dhënave të nevojshme.

Ndërkohë që, në vijim të procedurës hetimore, bazuar në të dhënat e administruara, sekretariati hartoi draft raportin e hetimit paraprak në tregun e barnave dhe pajisjeve mjekësore, nga ku u konstatua se mungesa e informacionit të kërkuar nga Agjencisë Kombëtare të Barnave dhe Pajisjeve Mjekësore, e bën të pamundur përcaktimin e strukturave të tregut dhe analizën e sjelljes së ndërmarrjeve në tregun e importit dhe shitjes më shumicë të barnave. Ndërkohë që, pavarësisht zgjatjes me 2 herë të përfundimit të afatit të hetimit, ai ende nuk është finalizuar, çka ka detyruar Autoritetin e Konkurrencës ta shtyjë sërish, duke vendosur që raporti i hetimit paraprak, që prej shtatorit duhet të paraqitet në Komisionin e Konkurrencës jo më vonë se 6 muaj. Procedura e hetimit paraprak në tregun e barnave dhe pajisjeve mjekësore përfshin periudhën kohore nga 1 janar 2019 deri në 30 nëntor 2020.

Ndërkohë që, analiza do të vlerësojë nëse ka kufizime, shtrembërime apo pengime të konkurrencës nga ndërmarrjet që operojnë në treg, nëpërmjet të drejtave ekskluzive, fuqisë se konkurrentëve në treg apo lidhjes së kontratave kufizuese. Paraprakisht, Konkurrenca vëren se çmimi i barnave në tregun farmaceutik nuk është element konkurrues, pasi fiksimi i tij për të paktën një periudhe 6-mujore dhe përcaktimi i tij në pullën e kontrollit e bën atë të pandryshueshëm, duke sjelle kufizim të konkurrencës me çmimet e produkteve në tregun farmaceutik nga aktorët e këtij tregu. Gjithashtu, oferta për barna në treg është e kufizuar për shkak të shkallës së lartë të fuqisë së tregut nga mbajtësit e patentave apo të drejtave ekskluzive ndërkohë që kërkesa për barna nuk përcaktohet drejtpërsëdrejti nga konsumatori (pacienti), por nga mjeket.

Në këtë mënyrë konsumatori nuk ka mundësi të bëjë zgjedhjen e tij bazuar në çmime më të lira dhe cilësi më të mirë, por si rregull ndjek udhëzimet e doktorit. Sipas Autortietit të Konkurrencës, Vlerësimi i këtij tregu pritet të sjellë një panoramë më të plotë për të parë ndikimin e tyre në përmirësimin e shërbimit shëndetësor në vend.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.