Dështon seanca konstituive – Kryetari Mikullovci e mbyll aksidentalisht, do të rifillojë në orën 15:00
Seanca e parë konstituive e Kuvendit të Kosovës është mbyllur me shumë paqartësi mbi procedimin e mëtejshëm për zgjedhjen e Kryetarit të Kuvendit dhe nënkryetarëve.
Deputetët e koalicionit PAN, i cili përbëhet nga PDK, AAK dhe Nisma, kanë hyrë me vonesë në sallën e Kuvendit, çka ka detyruar seancën të shtyhej me 30 minuta.
Pas betimit të deputetëve, Partisë Demokratike të Kosovës i është kërkuar të propozojë kandidatin për Kryetarin e Kuvendit, por deputeti Hoxhaj ka kërkuar një tjetër pauzë prej 2 orësh.
Duke kundërshtuar shtyrjen, deputeti i Vetëvendosjes Glauk Konjufca u shpreh se edhe nëse do t’i jepeshin dy orë të tjera PAN, ata sërish nuk do të mund ta zgjidhnin kryetarin.
Gjatë votimit, deputeti i koalicionit PAN Milaim Zeka ka rezultuar sikur nuk kishte votuar dhe kërkesa ishte refuzuar me 60 vota kundër, 59 pro. Pas kërkesës së këtij deputeti është bërë një rivotim dhe kërkesa për shtyrja është rrëzuar sërish me vota të barabarta.
Megjithatë, një lapsus i Kryetarit të seancës, Adem Mikullovci, si deputeti më i vjetër ka sjellë mbylljen e seancës.
Sekretariati i Kuvendit megjithatë ka vendosur për vazhdimin e seancës, po ditën e sotme në orën 15:00.
“Ne kërkuam shtyrje prej dy orëve por kryesuesi e mbylli”, u shpreh Lideri i Nismës, Fatmir Limaj për mediat.
Deklaratat e mëparshme nga palët politike kanë konfirmuar se nëse kandidati i PAN do të jetë Kadri Veseli, ai nuk do të votohet. Në rast se ky koalicion arrin të zgjedhë Kryetarin e Kuvendit atëherë kjo do të thotë se i ka numrat edhe për të formuar qeverinë.
SCAN
Seanca konstituive e Kuvendit të Kosovës – 3 Gusht 2017
Seanca konstituive e Kuvendit të Kosovës ku pritet që të zgjidhet kryetari dhe nënkryetarët
Posted by RADIO TELEVIZIONI SCAN on Thursday, August 3, 2017
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.