Dështon tenderi për rezervat ushqimore të shtetit – Agjencia e Blerjeve të Përqëndruara anulon procedurën: Asnjë ofertë e përshtatshme
Tenderi për blerjen e artikujve ushqimorë për Rezervat Materiale të Shtetit nuk është finalizuar me sukses. Agjencia e Blerjeve të Përqëndruara ka njoftuar anulimin e procedurës, duke argumentuar se shkak është bërë mosparaqitja e asnjë oferte të përshtatshme në procedurat me një faze. Fondi limit i vënë në dispozicion për këtë tenderi ishte 33.3 mln lekë, pa TVSH ndërkohë që referuar dokumenteve të tenderit synohej blerja e disa artikujve, sikurse janë: makaronat, mielli i grurit, vaji i lule diellit, fasulet, orizi, sheqeri apo kripa.
Procedura u hap në datën 17 mars, ndërsa vinte pas një presioni të shtuar, jo vetëm nag qytetarët, por edhe nga deputetët, të cilët kërkuan informacion mbi gjendjen e Rezervave Materiale të Shtetit, për shkak të luftës Rusi-Ukrainë. Në këto kuhste mbetet e paqartë sesi do të vijohet për të përmbushur këto nevoja, duke mbajtur parasysh se hapja e tenderit nënkupton mungesën e tyre.
Rezervat materiale të shtetit krijohen për të ndërhyrë, në mënyrë operative, për mbrojtjen e popullsisë, të ekonomisë dhe mbrojtjen e vendit, në situata të gjendjes së jashtëzakonshme, gjendjes së emergjencës civile, veprimeve terroriste, veprimeve ushtarake ( në gjendje lufte), të cilat sjellin dëme të menjëhershme e të rënda për jetën, për shëndetin e popullatës dhe të gjësë së gjallë, për pasurinë, për trashëgiminë kulturore dhe për mjedisin.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.