Detajet financiare e teknike të tre fazave/ Çfarë parashikon marrëveshja për naftën e nënshkruar mes qeverisë shqiptare dhe Shell

Ministri i Infrastrukturës dhe Energjisë Damian Gjiknuri dhe përfaqësuesi i kompanisë SHELL Jon-Henk van Konijnenburg firmosën marrëveshjen hidrokarbure për kërkim nafte në bllokun nr.4 në tokë. Nënshkrimit të marrëveshjes me ndarje prodhimi i paraprinë një proces gare dhe më pas një periudhë intensive 2 vjeçare negociatash.

Por çfarë parashikon marrëveshja e nënshkruar? Referuar njoftimit zyrtar të Ministrisë së Infrastrukturës dhe Energjisë, marrëveshja parashikon kërkimi i naftës në këtë Bllok të kryhet në 3-faza.

– Gjatë Fazës së Parë e cila do të zgjasë 3 vjet do të kryhen 125 km punime seismike 2D dhe ripërpunim i 125 km profileve seismike 2D. Angazhimi financiar minimal për Fazën e Parë shkon në rreth 8.5 milion USD.

– Faza e Dytë do të zgjasë 2 vjet. Gjatë kësaj faze do të kryhen 300 km punime seismike 2D dhe ripërpunim i 200 km profileve seismike 2D. Gjatë kësaj faze është opsional shpimi i një pusi kërkimi me thellësi 3000 m. Angazhimi financiar minimal për Fazën e Dytë shkon në rreth 20 milion USD.

– Faza e tretë do të zgjasë 2 vjet. Gjatë kësaj faze do të kryhet shpimi i një pusi kërkimi me thellësi minimale 3000 m dhe angazhimi financiar minimal për këtë fazë arrin në 14 milion USD.

Kohëzgjatja e kontratës për rastin nëse do të kemi një zbulim të ri, pra periudha e Zhvillim-Prodhimit, do të jetë deri në 25 vjet me të drejtë zgjatje.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.