Deti amerikan i 95 milionë viteve më parë: Një dritare në të kaluarën që na paralajmëron për të ardhmen!

Gjatë maksimumit termik të Kretakut, SHBA-ja Veriperëndimore u zhyt nga një det shumë i nxehtë: një dritare në të kaluarën që na paralajmëron për të ardhmen.

95 milionë vjet më parë do të kishim shkuar për të notuar në ujërat e ngrohta … të Wyoming (nëse do të na kishin lejuar dinosaurët). Një studim i Universitetit të Miçiganit analizoi fosilet e gocave deti dhe zbuloi se temperaturat në Detin e Brendshëm Perëndimor, që mbulonte në atë kohë Shtetet e Bashkuara veriperëndimore, ishin të ngjashme me ato të tropikëve të sotëm.

Rezultatet e studimit, të publikuara në “Geology”, nuk janë vetëm një dritare për të kaluarën, por edhe për të ardhmen klimatike të planetit tonë: “Këto të dhëna na ndihmojnë të kuptojmë se sa e ngrohtë mund të jetë Toka nëse emetimet e CO2 vazhdojnë të rriten”, shpjegon Sierra Petersen, një nga autorët.

Për të përcaktuar se cilat ishin temperaturat e detit gjatë Maksimumit Termik të Kretakut, një nga periudhat më të ngrohta klimatike të qindra miliona viteve të fundit, studiuesit analizuan 29 fosile goca deti të gjetura në Wyoming, Kolorado, Utah, New Mexico dhe Arizona. Gjatë rritjes, predhat inkorporuan izotope të ndryshme të karbonit dhe oksigjenit, në sasi të ndryshme bazuar në temperaturën e detit. Duke studiuar në veçanti frekuencën me të cilën izotopet e karbonit-13 dhe oksigjenit-18 grumbullohen me njëri-tjetrin, ekspertët ishin në gjendje të përcaktonin me saktësi temperaturën e detit ku jetonin dhe formoheshin gocat e detit, duke zbuluar se ishte midis 28 dhe 34 ° C.

Megjithëse ekspertët nuk janë dakord, sipas shumë studiuesve në kohën e Maksimumit Termik të Kretakut, përqendrimet e CO2 në atmosferë i kalonin 1000 pjesë për milion (ppm). Nivelet aktuale qëndrojnë pak mbi 420 ppm, por mund të kalojnë 1000 ppm deri në fund të shekullit nëse nuk ndalojmë emetimet e gazeve serrë. Nëse vazhdojmë kështu, me pak fjalë, në një shekull do të duhet të shkojmë në Alaskë për të shijuar një vapë “të durueshme”, nëse njerëzimi është ende në këtë planet. FCS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.