Detyra për sigurimet dhe shoqëritë e administrimit – AMF: Të marrin masa të shtuara për të përballuar rrisqet e COVID-19
Në përgjigje të pandemisë COVID-19, me qëllim reduktimin e çdo lloj risku të mundshëm, Autoriteti i Mbikëqyrjes Financiare u ka kërkuar të gjithë operatorëve të tregjeve nën mbikëqyrje që të përditësojnë dhe të kenë funksionale plane të vazhdimësisë së veprimtarisë dhe planet e përballimit të krizave, ku të detajohen të gjithë elementët teknikë, logjistikë, njerëzorë dhe financiarë për përballimin e efekteve të mundshme.
Konkretisht, përmes një udhëzimi të veçantë shoqërive të sigurimit dhe shoqërive administruese u kërkohet që të marrin masat për të siguruar vazhdimësinë e biznesit; Të mbajnë nivelin e përshtatshëm të likuiditetit, të marrin masa të tjera të nevojshme për të ruajtuar pozicionin e treguesve si dhe të informojnë menjëherë Autoritetin në rast të shkeljes së këtyre treguesve. Sigurimeve u kërkohet të shikojnë mundësinë e ndryshimit të marrëveshjeve të risigurimit, për të kufizuar ekspozimin ndaj COVID-19, duke marrë në konsideratë një nivel mbajtjeje agregate, për të gjitha ngjarjet që mund të ndodhin brenda vitit si pasojë e COVID-19.
Të marrin masa për të përditësuar faqet zyrtare të internetit, me seksione të dedikuara lidhur me ndikimin e pandemisë shkaktuar nga COVID-19, duke pasqyruar dhe masat e marra nga vetë shoqëria e sigurimit; Të rishikojnë kushtet e kontratave të sigurimit, për të reflektuar çdo ndryshim të ekspozimit të risqeve gjatë periudhës së pandemisë. Për produktet që lidhen me mbulimin nga pandemitë, të qartësohen mbulimet e tyre në raste të ndodhjes së ngjarjeve të siguruara. Të kryejnë një vlerësim të produkteve të cilat mund të ndikohen nga pandemia duke informuar personat e siguruar; Të përditësojnë udhëzimet/procedurat e marrjes në sigurim në vijim të ngjarjes së COVID – 19.
Ndërsa, shoqërive të administrimit u kërkohet të rivlerësojnë treguesin sintetik të përfitimit dhe rrezikut në drejtim të përditësimit të dokumentit me informacionin kyç për investitorin; të kenë një vëmendje të shtuar ndaj administrimit të rrezikut, si dhe të monitorojnë vazhdimisht plotësimin e parametrave ligjorë dhe rregullatorë, si dhe të informojnë menjëherë autoritetin në rast të shkeljes së këtyre parametrave.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.