Detyrimet ndaj doganave – Normat e interesit për kamatëvonesat, reference BSH

Detyrime të prapambetura  nuk ka vetëm shteti tek biznesi, por edhe  sipërmarrja vetë te administrata fiskale. Operatorët  ekonomikë që kryejnë shkëmbime tregtare  jashtë vendit, pra aktivitete eksport dhe import, mund të  jenë në një farë mënyrë  “subjekte borxhlie”.

Ky detyrim i prapambetur krijohet në momentin kur dorëzojnë deklaratat doganore. Në shumë raste pagesa e këtij borxhi zgjidhet me formën e garancisë, e cila mund të përcaktohet në disa mënyra. Kjo garanci mund të ketë vlerën totale të borxhit doganor, mund të ketë një pjesë të saj apo edhe mënyra të tjera garantimi brenda dispozitave ligjor.

Por si procedohet më këto  sipërmarrje  që kthehen “ në subjekte borxhi doganor” dhe kur ky detyrim nuk shlyhet në kohe?  Ministria e Financave ka përcaktuar tashmë në një udhëzim, ku  mbi këto “debitorë”  aplikohet kamatvonesa, e cila  ka të përcaktuar edhe normën e interesit.

Kështu sipas Drejtorisë së Përgjithshme të Doganave bazë për llogaritjen e kamatvonesave “norma e kamatëvonesave  është e njëjtë me normën e aplikuar  në ditën e parë të muajit në fjalë nga Banka e Shqipërisë, për operacionet e saj kryesore të rifinancimit, të rritura me 2 %”.

Sipas të dhënave  nga Ministria e Financave, për periudhën e parë të vitit  2017 ky interes ishte më i lartë. Referuar udhëzimit të Financave, interesi ishte 3.75 për qind,  kur borxhi shlyhej brenda muajit, ndërsa kur borxhi nuk shlyhej brenda muajit interesi ishte në masën 6 përqind.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.