Deutsche Bank, optimiste për ekonominë. PBB botëror pritet të rikuperojë humbjet e Covid-19 në mes të vitit 2021
Prodhimi ekonomik botëror do të rikthehet në nivelet e përpara pandemisë në mes të vitit 2021, pas një rimëkëmbjeje më të fortë se ç’pritej në muajt e fundit, sipas Deutsche Bank, që shton se nivelet e borxhit dhe ndryshimi i politikave mund të rrisin rrezikun e një krize financiare. “Rimëkëmbje botërore ekonomike nga goditja e covid-19 ka ecur shumë më shpejtë se ç’pritej”,-deklaroi banka. Ndërkohë që tremujori i tretë po përfundon, huadhënësi gjerman vlerëson se niveli i PBB botëror ka rikuperuar thuajse gjysmën e humbjes nga koronavirusi. Deutsche Bank rriti projeksionet për ekonominë botërore, ndërkohë që pret një tkurrje me 3.9% këtë vit, pas tkurrjes prej 5.9% që priste në Maj.
Për vitin 2021, banka pret një rritje prej 5.6%, nga 5.3% që priste më parë. Megjithatë, ekzistojnë shumë pasiguri në perspektivë. Shqetësimet për një valë të dytë të koronavirusit po shtohen në Shtetet e Bashkuara dhe Europë, ç’ka po rrit pasigurinë mbi perspektivën ekonomike. Zgjedhjet në Shtetet e Bashkuara dhe rikthimi i “hard” Brexit kanë nxirë gjithashtu panoramën. Një tjetër shqetësim është ndryshimi i politikave monetare. “Rritja e borxhit dhe mbivlerësimi i aktiveve që është fryrë nga politikat tejet lehtësuese monetare, kanë ngritur rrezikun e një krize botërore financiare, pasi bankat të largohen nga këto politika”,- deklaron Deutsche Bank.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.