Digjitalizimi – AMA shtyn afatin deri më 10 shtator për Tiranën e Durrësin

Autoriteti i Mediave Audioovizive ka vendosur të shtyjë afatin deri më datë 10 shtator për mbylljen e transmetimeve analoge në qarqet Tiranë e Durrës. Sipas AMA-s kjo është bërë me kërkesë të operatorëve kombëtarë, rajonalë e lokalë me të cilët ka zhvilluar disa takime ku ata kërkonin shtyrjen e datës së mbylljes së transmetimeve analoge.

Data e përcaktuar nga AMA për këto dy qarqe ishte më 31 korrik 2018. Operatorët kanë kërkuar shtyrje të afatit për një periudhë njëmujore pasi janë duke përshtatur pajisje që përputhen me rregulloren e renditjes së programeve të miratuara nga AMA.

Ndërkohë, sipas AMA-s edhe Shoqata e Transmetuesve Radiotelevizivë kabllorë-valorë, RRTL ka adresuar një sërë kërkesash lidhur me vështirësitë e hasura në procesin e digjitalizimit të transmetimeve si dhe me kohën e pamjaftueshme në dispozicion për përfundimin e procesit të digjitalizimit për qarqet Tiranë e Durrës.

Kërkesat u adresuan në takimin që zhvilloi Komisioni Parlamentar për Edukimin dhe Mjetet e Informimit Publik, ku kryesia e Komisionit shprehu mirëkuptimin lidhur me shqetësimet e operatorëve. Nisur nga kjo, AMA vendosi për një shtyrje të afatit me një muaj të fikjes së transmetime analoge për dy qarqet e vendit.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.