Diplomat, ende me bollëk – Në pesë vjet, 165 mijë shqiptarë morën arsimin e lartë
Numri i shqiptarëve që u diplomuan në arsimin e lartë ra lehtë vitin e kaluar, megjithatë çdo vit arsimi i lartë në Shqipëri nxjerr, në të gjithë nivelet, një numër të diplomuarish pothuajse të përafërt me numrin e nxënësve që mbarojnë arsimin e mesëm. Të dhënat e Instat tregojnë se vitin e kaluar në Shqipëri u diplomuan mbi 35 mijë studentë në arsimin e lartë, në rënie me 3% krahasuar me vitin 2017. 58% e numrit të të përgjithshëm të të diplomuarve i takojnë nivelit bachelor.
Ndjekja e studimeve të larta ngelet gjerësisht e preferuar mes të rinjve, megjithëse, nga ana tjetër papunësia mes të diplomuarve po rritet. Sipas Instat, ky tregues arriti në 14% vitin e kaluar. Në total, numri i të papunëve me arsim të lartë vlerësohet në rreth 39 mijë, edhe më shumë se numri i të diplomuarve gjatë një viti në arsimin e lartë.
Tregu në këtë segment nuk duket i lehtë dhe kërkesa për punë është mjaft e lartë, po të kemi parasysh se në pesë vitet e fundit 165 mijë shqiptarë janë diplomuar në të gjithë nivelet e arsimit të lartë.
Ekspertët dhe sipërmarrësit prej vitesh shprehen se tregu ka më shumë nevojë për punonjës me arsim profesional, por, po të shohim statistikat nuk vërehet ndonjë riorientim domethënës i të rinjve drejt zanateve. Vitin e kaluar, në arsimin profesional u diplomuan më pak se 4200 nxënës, në rënie me 20% krahasuar me vitin 2017.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.