Disa efekte negative të Brexit – Paralajmërime për mungesë të barnave në Europë
Data e daljes së Britanisë nga Bashkimi Europian po afron dhe analistët po paralajmërojnë se do të ketë mungesë të disa barnave në Europë. Lobi i ushqimit dhe pijeve në Britani paralajmëroi javën e kaluar se vendi do të përballet me mungesa të disa produkteve nëse ka dalje pa marrëveshje. Kompanitë e farmaceutikës kanë shprehur të njëjtat shqetësime për barnat.
Ndikimi te dërgesat e barnave pritet të ndihet edhe përtej Britanisë. Thuajse 45 milionë pako të barnave eksportohen nga Britania drejt Europës çdo muaj, një tregti që vlente rreth 12 miliardë paund në vitin 2016. Ekspertët thonë se ndërprerjet e dërgesave janë të pashmangshme nëse Britania del pa marrëveshje. Kryeministri Boris Johnson ka thënë se do të nxjerrë vendin nga Europa qoftë edhe pa një marrëveshje të divorcit më 31 Tetor. Disa barna mund të mos kenë miratimin rregullator që të vazhdojnë të importohen nga Britania në Europë.
Rritja e kontrolleve doganore në porte dhe kufij të tjerë mes Britanisë dhe Bashkimit Europian mund të ndërpresë gjithashtu furnizimet me barna dhe kimikate të tjera që duhen për ti prodhuar. Agjencia Europiane e Barnave (EMA), deklaroi se Europa është e mirë përgatitur për Brexit dhe ka përfunduar autorizimet për thuajse të gjithë 400 produktet që po monitorohen. Megjithatë, sipas zyrtarëve të agjencisë, disa autorizime nuk kanë ndodhur ende dhe disa barna të rëndësishme mund të bllokohen për shkak të barrierave rregullatore.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.