Disbalanca e investimeve në qarqe, Gurakuqi: Ju tregoj sa para ka marrë Shkodra
Një ditë para seancës plenare të diskutimit nen për nen të buxhetit dhe paketës fiskale, deputeti i Partisë Demokratike, Romeo Gurakuqi ka shpjeguar për emisionin “Argument” se ku qëndrojnë disbalancat në shpërndarjen e fondeve shtetërore të vetë bashkive.
Në rastin konkret, deputeti Gurakuqi ka folur për Shkodrën, ku ka cituar disbalanca në fondin e zhvillimit të rajoneve dhe në transfertën e pakushtëzuar.
“Bashkia Shkodër në vitin 2016 ka marrë 0.5% të fondeve nga qeveria, në vitin 2017 0.1%. Fondi Shqiptar i Rajoneve, në vitet 2015-2016 i ka akorduar Shkodrës vetëm 1%, për ujitje-kullimin vetëm 2% të fondit. FZHR në 2017 i ka dhënë Shkodrës 6.7 %, Lezhës 3.5%, Dibrës 2.6%, Kukësit 0.5%, Korçës 16%, Fierit 14.80%, Durrësit 9%, Elbasanit 8%, Vlorës 7.5%”, shprehet deputeti i PD-së.
Në lidhje me këto fonde të zhbalancuara ndërmjet qyteteve të mëdha të Republikës së Shqipërisë, Romeo Gurakuqi ka dhënë arsyet e vendimeve politike dhe qëndrimet e ministrave të qeverisë.
“Sipas këndvështrimit për shkak se në bordet ku bëhet kjo shpërndarje janë ministrat e qeverisë, të cilët janë të prirur jo duke shqyrtuar projektet të cilat paraqesin bashkitë, por duke u kapur pas defekteve të vogla dhe duke i adresuar këto fonde, edhe të pakta qofshin, aty ku iu intereson politikisht”, shprehet Gurakuqi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.