Diskutimi në “Argument” – A është gati Bashkimi Europian të pranojë Shqipërinë?
Në emisionin “Argument” nga Enio Civici mbrëmjen e sotme është diskutuar rreth situatës së integrimit në Shqipëri dhe pritjes së proges-raportit nga Këshilli Europian për vendin tonë, ku përshkruhet situata në disa prej sektorëve kyç të institucioneve që ndikojnë edhe në jetën e qytetarëve.
Shqipëria pret një vendim shumë të rëndësishëm në samitin e Zagrebit për hapjen e negociatave dhe që më pas do të sillte hapjen e kapitujve të përcaktuara nga metodologjia e re zgjerimit për tu bërë anëtare e Unionit.
Bashkimi Europian ka krijuar edhe një sondazh mbi perceptimin që shqiptarët kanë për BE-në dhe asistencën që Unioni duhet të ofrojë apo të bëjë ndryshe për ta.
Të ftuar për të folur në studio rreth kësaj teme ishin Agim Nesho dhe Ben Andoni.
Agim Nesho, diplomat i njohur karriere, ka analizuar metodologjinë e re të prezantuar nga Komisioni Europian dhe që sipas tij është një konsensus midis Francës dhe Gjermanisë, për të shuar diferencat midis dy fuqive për këtë temë:
“Më shumë karrota dhe më shumë shkopinj do ta përshkruaja metodologjinë e re. Shihet qartë se është bërë një kombinim për tu përafruar dy fuqitë më të mëdha europiane si Gjermania dhe Franca. Arsyet mbi të cilat presidenti Macron pengoi hapjen e negociatave duket se janë futur në këtë proces si për shembull insistimi i tij për procesin ligjor si dhe ideja që shtetet e reja, të cilat futen në BE të kthehen në një proces politik.
Do të jetë një konsensus më i gjerë i shteteve dhe proceset do të jenë të matshme në realizimin e detyrave aktuale. Serbia dhe Mali i Zi do të jenë brenda këtij procesi. Këtu riaktivizohen vlerat e BE-së, vihet theksi te shteti ligjor. Kjo është diçka shumë komplekse dhe Soreca e propagandon tek nisma Anti-KÇK. Lufta ndaj korrupsionit, pushtetet e pavarura, respektimi i institucioneve, mos-ndërhyrja e politikës në organet e drejtësisë dhe ligji për të gjithë njësoj, janë disa nga karakteristikat e shteti ligjor.
Ka prevalaur ideja e kancelares Merkel, e cila e shikon si një hap gjeopolitik zgjerimin. Këtë luftë e fitoi Merkel, sepse ndodhën shumë ngjarje që rrezikuan integritetin e Europës dhe ky hap shihet si mundësi par ta stabilizuar atë.
Mini-shengeni rajonal është gjithashtu një hap për të kërkuar hapësira të tjera nga liderët e vendeve të Ballkanit Perëndimor që duken disi të frustruar dhe për të mos pritur BE-në.”
Ben Andoni, gazetar i mirënjohur, shprehu mendimin se metodologjia e re është pozitive për Shqipërinë duke e bërë procesin më të vështirë, por më real për atë çfarë do të përfaqësojë:
“E parë në një këndvështrim tjetër duket që Europa do të marrë frymë sepse e di që është në një moment shumë të vështirë, pasi Brexit nuk do ta kalojë kollaj së bashku me problemin e Ukrainës në lidhje me Rusinë.
Metodologjia e re mbështetet në katër kolona dhe tani hapën nga 6 kapitujt që shkonin në mënyrë simetrike. Duke parë Ballkanin ky proces është shumë i vështirë. De Jure është marrë vendimi për pranimin e Shqipërisë, por problem i madh është a do kapet caku i 2005-ës në kalimin e pritshmërive nga proges-raporti. Në politikën e re të zgjerimit duket se është gjetur një lloj martese e mendimit të Gjermanisë me Francën.
Në të parashikohet që mos-konservatorizmi i Francës të mos marrë jetë dhe ndikimi i Gjermanisë për të hapur negociatat të vihet në jetë. Serbia dhe Mali i Zi kapitujt që i kanë hapur nuk mund t’i rihapë, vetëm nëse do të ketë kërcitje ose problematika të mëdha përsëri.
Problem i madh është me Shqipërinë dhe Maqedoninë pasi pas hapjes së negociatave, fillojnë problem të tjera në kapitujt që do të vijnë. Për mendimin tim një problem i madh, që ndoshta ende nuk parashikohet do të jetë ai i mjedisit, pasi BE-ja ka kushte shumë të forta në këtë aspekt.
Ndërkohë për nismën e re Anti-KÇK dhe hapin pozitiv që ajo tregon drejt BE-së mendoj se ne si shtet kemi bërë gjithnjë fushata ndaj krimit të organizuar, por nuk janë arrestuar kokat e krimit dhe ky është problem i madh. Metodologjia besoj se i favorizon vendet tona në tërësinë e tij.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.