Diskutimi në “Argument” – A janë shqiptarët më të informuar në ditët e sotme
Në emisionin “Argument” nga Enio Civici në mbrëmjen e sotme është diskutuar rreth një teme që prek të gjithë qytetarët shqiptarë, pikërisht të drejtën e informimit dhe
Mbrojtja e të dhënave personale dhe transparenca e institucioneve publike janë dy nga aktivitetet kryesore të Komisionerit për Informimin dhe Mbrojtjen e të Dhënave Personale.
I ftuar për të diskutuar rreth veprimtarisë së këtij institucioni ishte z. Besnik Dervishi, i cili ka shpjeguar në detaje punën e përditshme dhe ankesat që vijnë për të drejtën e informimit në Shqipëri.
Pyetjes së moderatorit Civici nëse Shqipëria sot ka më shumë akses në informim se në 2015-ën, z.Dervishi iu përgjigj në këtë mënyrë.
“Në fund të 2014 është miratuar ligji i ri për të drejtën e informimit. Ky ligj ka sjellë disa risi. Ka caktuar fillimisht një institucion përgjegjës, i ka dhënë kompetenca proceduriale-ekzekutive, ku ne sot kemi mundësi nga nisja e një hetimi deri tek vendosja e sanksioneve për ata që nuk i japin informacion autoriteteve publike. Sot kemi më shumë autoritet në këtë drejtim. Për të dhënë një fakt interesant, para ligjit të ri Shqipëria renditej në vendin e 85-të, ndërsa sot jemi të 6-tët në botë në renditjen shteteve me ligjet më të mira për informimin publik.”
Dervishi ka bërë thirrje për të gjithë qytetarët shqiptarë që t’i përdorin instrumentet që ofron ligji si dhe përgëzoi shoqërinë civile dhe mediat për kontributin e tyre në të drejtën e informimit:
“Kemi një ligj të mirë, por edhe pse ka një institucion monitorues përgjegjës, kjo është mbi të gjitha detyrë e të gjitha institucioneve publike duke filluar nga instancat më të larta. Gama e përgjegjësisë është mjaft e gjerë, por rolin kryesor e ka vetë qytetari. Njerëzit duhet ta shfrytëzojnë këtë instrument që ka dhënë ligji, duke i detyruar autoritetet publike mbi transparencën e tyre.”
“Pa kontributin e shoqërisë civile dhe medias, nuk do të ishim në këtë fazë sot, ku informimi i qytetarëve është rritur në mënyrë të ndjeshme. Ne po përgatisim raportin për Kuvendin. Ka mijëra ankesa që shkojnë drejt institucioneve publike. Mbi 90% prej këtyre u kthehet përgjigja, pa ndërhyrjen e Komisionerit. Tek ne vijnë mesatarisht rreth 800 ankesa në vit, që nuk kanë marrë përgjigje ose që nuk janë të kënaqur nga institucionet publike.”
Përsa i përket tendencave dhe institucionet ku shqiptarët kanë ankesat më të shumta, duket se vendin kryesor e mbajnë organet e qeverisjes vendore dhe autoritete nga të cilat individët kanë interesa personale:
“Interesat më të mëdha janë ndaj Bashkisë, ndaj zyrës së Kadastrës ku lidhet çështja e pronave, tek Sigurimet Shoqërore, pra gjëra që prekin qytetarët personalisht. Bashkia e Tiranës është e para me më shumë ankesa, por kjo nuk do të thotë se është më keq me transparencën, por thjesht sepse kjo Bashki ka numrin më të lartë të qytetarëve në Shqipëri. Shoqëria Civile jep një kontribut shumë të madh në monitorimin e transparencës së autoriteteve publike. Por, edhe media që i godet më tej këto institucione për të qenë transparente. ”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.