Diskutimi në “Argument” – Bilanci i 2019-ës, çfarë tregoi moshapja e negociatave për Shqipërinë
Në emisionin e sotëm “Argument” nga Enio Civici po flitet rreth bilancit të ngjarjeve më të rëndësishme që kanë ndodhur në Shqipëri për vitin 2019.
Një vit i mbushur plot me sfida ekonomike, sociale dhe politike për shoqërinë dhe që padyshim ka lënë gjurmët e veta në memorien e secilit prej nesh.
Për të diskutuar rreth momenteve më të rëndësishme dhe impaktit që ato patën në jetën e gjithsecilit prej nesh, të ftuar për te folur ishin Ben Andoni, Rezart Prifti, Suzana Guxholli, dhe Genti Beqiri.
Tema e parë për të cilën moderatori Civici kërkoi mendimin e panelit ishte mos-hapja e negociatave për Shqipërinë drejt BE-së.
Genti Beqiri është shprehur se kjo ishte një shuplakë e fortë për Shqipërinë duke bërë të ditur se kjo zgjedhje e ka ulur mjaft moralin e qytetarëve dhe frymën e tyre për BE-në:
“Patjeter që mos-hapja e negociatave ishte një shuplakë për të gjithë kombin tonë. Kjo mënyrë që u zgjodh nga liderët ishte e tillë, për ta nderprerë disi shpresën e angazhimit dhe hyrjes në BE. Kemi bërë gabime gjatë rrugës, të cilat u duk qartë se na kanë kushtuar. Tashmë ne duhet të kapim kohën dhe të rikuperojmë. Ky vendim për mendimin tim na preku më së shumti në anën morale, pasi të gjithë e dinim se nuk do të shkurtohej koha për të hyrë në BE, por do shërbente si një motivim, duke marrrë parasysh se jemi të rrethuar nga vende që këtë proces e kane kaluar si Mali i Zi dhe Serbia. Për mua, negociatat janë një proces maloreje që vetëm do të vështirësohen.
Ndërkohë Suzana Guxholli, eksperte e ekonomisë, është treguar e ashpër në qëndrimin e saj, duke sjellë në vëmendje shifra konkrete që treguan dështimin e qeverisë shqiptare:
“Për mua refuzimi i negociatave ishte një proces i paralajmëruar. Kemi një Shqipëri, që indikatorët e ekonomisë i ka në gjendje shumë të keqe. Dua të sjell në vëmendje raportin e Bankës Botërorë “Doing Business” ku kishim rënë me 11 vende në pozicion. Rënia indikatorit për mbrojtjen e investitorit bie ne sy, ku kemi shkuar në vendin e 111-të. Më tej, po t’i referohemi korrupsionit jemi në të njëjtat vende me Afrikën dhe Azinë e humbur. Nuk është çudi pra që Europa na ndëshkon në këtë mënyrë. Gjithashtu ndaj bindjen se Maqedonia u pezullua prej nesh dhe se është mjaft përpara me procesin e anëtarësimit.
Ben Andoni, gazetar i mirënjohur ekonomik, ka sjellë në fokus faktin se edhe tensionet e brendshme të vendeve anëtarë në Bashkimin Europian kanë pasur efektin e tyre në çeljen e negociatave:
“Në marrëveshje të caktuara kemi plotësuar indikatorët kryesorë për të qenë diku si anëtarë të NATO-s, edhe pse nuk e kemi ende buxhetin. Në vitin 2015 është bërë një kompozim i Shqipërisë me Maqedoninë, përsa i përket procesit, ndërkohë që Bosnja renditet më ulët se ne. Edhe një dekadë tjetër mendoj se do të vazhdojë kështu dhe shpresojmë që gjërat të mos marrin edhe për më keq. Duhet thënë gjithashtu se tensioni i brendshëm në Bruksel ka sjellë problemet e veta. Nëse funksionon plani i propozuar nga Macron për zgjerimin, atëherë vetëm në fazën e plotësimit të standarteve mjedisore, Shqipërisë mund t’i duhen vite për të plotësuar kushtet. Në vitet e fundit kemi një rënie të shumë prej indikacioneve kryesore ekonomike dhe shumica prej tyre nuk janë shifra reale, por që kanë nevojë për tu përditësuar.”
Rezart Prifti, pedagog në Fakultetin Ekonomik, në mendimin e tij e ka përqendruar vëmendjen tek fakti se Shqipëria nuk duhet ta ketë prioritet kaq të lartë BE-në, por të fokusohet më tepër në përmirësimin e ekonomisë saj:
“As nuk më hyn në punë, nëse Shqipërisë i janë hapur apo jo negociatat. Për investitorët e huaj që duan të vinë në vendin tonë, për krijimin e vendeve të reja të punës, askujt nuk i intereson tensioni i brendshëm që ekzistonte në Bruksel, apo vendimet që priteshin me kaq ankth nga qytetarët nëse do të hapej apo jo porta e BE-së. Unë mendoj se qeveria shqiptare kishte përgatitur një “show” propagandistik për të mbrojtur dështimet e veta, por ata zotërinjtë e BE-së nuk e hëngrën dhe i panë realisht indikatorët ekonomikë që janë përkeqësuar. Duhet thënë se kancelaritë europiane nuk i mbledhin shifrat vetëm nga institucionet zyrtare, por kanë edhe të tjera burime alternative më konfidenciale. Në këtë sens unë mendoj se ka ardhur koha të bëjmë pyetjen, ne çfarë do të bëjmë për vendin tonë dhe të fillojmë të shohim përtej BE-së.”
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.