Diskutimi në “Argument” për draftin e Buxhetit të Shtetit – Ku do të shkojnë paratë në 2020-ën?
Në të enjten e sotme, në emisionin “Argument” nga Enio Civici tema e diskutimit ka qenë Projektligji për “Buxhetin e Shtetit”, në një dokument të siguruar ekskluzivisht nga “Scan Tv”.
Teksti nuk është ende i konfirmuar nga qeveria dhe firmosur nga Këshilli i Ministrave, por është i vetëm tekst publik, që ekziston për konsultim.
Të ftuar në studio ishin tre ekonomistë dhe njohës të mirë të tregut si Bardhi Sejdarasi, Arben Shkodra dhe Dritan Shano, të cilëve iu shtrua pyetja se “Ku do të shkojnë paratë në 2020-ën?”.
I pyetur nga moderatori për karakteristikat kryesore që paraqet ky buxhet, zoti Shano, një ekonomist i mirënjohur në politikat publike, është përgjigjur se ai reflekton vetëm tre të tilla dhe se në përbërje të tij është mjaft i çuditshëm:
“Draft-buxheti i 2020-ës është për mua i çuditshëm sepse ndërtohet mbi një premisë që premton rritje ekonomike prej 4.1%. Duke qenë se kam qene vetë hartues buxhetesh, premisa e parë është rritja ekonomike. Një njeri që harton buxhete shton edhe inflacionin, shton edhe mirë administrimin e taksave dhe bën projeksionin e buxhetit. 4.1% rritje, plus 2.1% inflacion dhe plus 1% mirë-administrim u bënë 7.1%. Ky duhet të ishte projeksioni minimal i Draft-buxhetit për të pasur të paktën besim në atë që vetë themi. Në këto kushte unë kam dy frikëra: Në vitin e ardhshëm ose do kemi të legjitimuar 0.9% të GDP-së si evazion fiskal ose rritja ekonomike nuk është 4.1% sa pretendohet por 2.1%. Këto janë llogaritjet e mia mbi draftin.
E dyta TVSH-ja, parashikohet me 0.2% rritje 2019-2020. Qeveria ka pranuar që ekonomia shqiptare nuk merr më frymë. Karakteristika e tretë, është që investimet publike ulen, pra janë më të ulëta se një vit më parë dhe ky është një indikator mjaft shqetësues.”
Nga krahu tjetër Arben Shkodra, Sekretari i Përgjithshëm i Bashkimit të Prodhuesve është fokusuar mbi paketën fiskale dhe mungesën e informacioni që qarkullon mbi Draft-Buxhetin:
“Po spekulohet që në këtë draft kemi paketë fiskale, por nuk është e tillë. Këtu po flasim për një korrigjim të disa shifrave. Për mua diskutimet duhet të kishin filluar që në mars, në mënyrë që të gjithë grupet e interesit të shprehin propozimet e tyre dhe palët të bien dakord. Në këtë vit ka një ligj për fiskalizimin që Shoqata jonë e ka kundërshtuar dhe kemi treguar kush janë problematikat, që besojmë se janë të drejta siç kemi pasur për shumë politika të tjera, në vitet më përpara.
Kjo mungesë informacioni që po ndodh mbi ligjin më të rëndësishëm të shtetit po kthehet në një sjellje të natyrshme të qeverisë. Ligji nuk mundet të gjendet as në portalin e konsultimit publik, por as në media për tu diskutuar. Është qesharake të diskutojmë mbi një draft, i cili ende nuk ka kaluar konsultimet dhe komisionet e ndryshme. Buxheti i 2019-ës për ne tregoi se qeveria ia kishte futur kot me parashikimet e saj në 2018-ën. Në të nuk reflektohen nevojat tona për të ndryshuar disa gjëra themelore.”
Ndërkohë, gazetari i njohur i fushës ekonomike Bardhi Sejdarasi kishte një mendim disi ndryshe nga dy të ftuarit e tjerë:
“Drafti është e qartë dhe nga informacionet që unë kam se nuk është ende gati për tu publikuar. Paketë fiskale nuk do ketë, pasi sivjet ka ndodhur diçka tjetër. Si paketë fiskale duhet marrë ligji i fiskalizimit, i cili ndryshon 8 ligje themelore.
Përsa i përket rritjes ekonomike për mua situata është shumë e paqartë. Pse duhet të jetë 4.1% rritja ekonomike, për mua duhet të jetë 2.5% ose 8.2 %. Askush nuk mund të më kundërshtojë për këtë pasi nuk kemi asnjë lloj ekspertize apo institucion të pavarur, që të paktën të ketë mundësinë të bëjë një ekspertizë, pra askush nuk e mat ekonominë shqiptare. Eksperienca ka treguar që matjet nuk mund të jenë të besueshme nga ekspertët e ministrisë së financave dhe po vazhdoi ta situata në këtë mënyrë nuk do të ketë kurrë saktësi.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.