Disney “tradhton” Netflix – Tërheq filmat, do krijojë vetë një platformë
Netflix ka marrë ndoshta goditjen më të madhe që prej krijimit. Gjigandi Walt Disney ka deklaruar se do të tërheqë të gjitha produktet e saj nga platforma për të krijuar një platformë të sajën të transmetimit online të filmave dhe serialeve.
Kështu, Netflix, jo vetëm që ka humbur një prej klientëve të saj më të mirë, por rrezikon që shumë shpejt të përballet me një konkurrencë të egër në një treg në të cilin aktualisht mbretëron.
Ka mjaftuar ky njoftim i Walt Disney që aksionet e Netflix në bursë të binin me të paktën 6%.
Strategjia e re do të hyjë në funksion duke filluar prej vitit 2019 dhe kompania më e madhe në botë e argëtimit kërkon që të tërheqë kështu shikuesit dixhital, të cilët po i largohen çdo ditë e më shumë televizionit tradicional.
Kompania ka arritur në përfundimin se, do të gjenerojë më shumë fitim në terma afat-gjatë nëse do të krijojë një platformë të sajën me anëtarësime, në vend që t`i japë me qira filmat dhe shërbimet e saj një kompanie tjetër, si Netflix. Vendimi ka peshuar edhe mbi aksionet e Walt Disney, që humbën plot 3.8%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.