Dita e borxhit ekologjik – Shqipëria tejkalon mundësitë e Tokës për t’u rigjeneruar
Shqipëria harxhon resurset e 1,33 të planetit, çka do të thotë se tejkalon mundësitë që Toka ka për t’u rigjeneruar brenda një viti.
Të dhënat bëhen publike nga Rrjeti Global për Ndikimin Ekologjik, në prag të Ditës së Borxhit Ekologjik, që këtë vit do të shënohet të mërkurën.
Sipas kësaj organizate, në vendin tonë ndikimi ekologjik përbëhet nga dioksidi i karbonit, toka bujqësore, pyjet, toka për kullotje, peshkimi dhe toka për banim. Ndërkohë që, të gjitha vendet e rajonit jetojnë mbi kapacitetet natyrore të tyre.
Në vitin 1997, Dita e Borxhit Ekologjik u shënua në fund të muajit shtator, ndërsa këtë vit në 2 gusht, data më e hershme prej viteve 70-të, kur ky borxh filloi të matej.
Me fjalë tjera, për momentin globi është duke përdorur resurset 1,7 herë më shpejtë se sa ekosistemet mund të rigjenerohen. Pra në nivel global jemi duke përdorur resurset sikur të kishim në dispozicion 1,7 planetë.
Harxhimet nga përdorimi ekologjik global po reflektohen gjithmonë e më tepër me reduktimin e pyjeve, thatësirat, mungesat e ujit, erozionet e dheut, humbjet e shumëllojshmërisë biologjike dhe grumbullimit të dioksidit të karbonit në atmosferë.
Ekspertët kanë thënë se ulja e sasisë së ushqimit që hidhet me 50% në gjithë botën do të mund të lëvizte Ditën e borxhit ekologjik për 11 ditë, ndërsa ulja e emetimit të dioksid karbonit me 50% do të lëvizte datën për 89 ditë.
Për këtë arsye Rrjeti Global për Ndikimin Ekologjik iu bën thirrje të gjithëve, që përmes zbavitjes dhe aktivitetit të përditshëm të ulin ndikimin personal ekologjik.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.