“Dita e mirë duket në mëngjes” – Tregtia e Jashtme! Tekstilet gjejnë “rrugën” e eksportit në janar/ Cilët zëra po rikuperojnë?
Fillim viti i 2021 është një moment “kyç” sa i takon Tregtisë së Jashtme, i cili jo domosdo tregon vijimësinë e të gjithë muajve që janë përpara, por të paktën krijon mundësinë për të perceptuar nëse ka nisur një soj rikuperimi apo jo, krahasuar me vitin pandemik.
“Dita e mirë duket në mëngjes” thonë, e ky është rasti për tekstilet dhe këpucët. Raporti më i fundit i Institutit të Statistikave tregon se ky zë ka rikuperuar ndjeshëm krahasuar me dhjetorin e 2020- ës, duke dhënë shenjat e para të përafrimit me trajektoren normale të “epokës” para pandemisë.
Sipas të dhënave të INSTAT, në janar 2021, eksporti i tekstileve dhe këpucëve ka rezultuar në vlerën 9.2 miliardë lekë. Konkretisht, 1.3 miliardë lekë më shumë se në dhjetor 2020.
Nga ana tjetër, përpos tekstileve dhe këpucëve, Mineralet dhe lëndët djegëse kanë dëshmuar një trend të vogël rritje. Në dhjetor 2020, eksporti i këtij zëri ishte në vlerën 3.3 miliardë lekë. Ndërkaq, në janar 2021, kjo vlerë u ngrit në 3.5 miliardë lekë.
Makineritë, pajisjet dhe pjesët e këmbimit po ashtu po “imunizohen” nga COVID – 19, referuar Instat. Ky zë, po njësoj, ka ndjerë rritje krahasuar me dhjetor 2020. Në muajin përmbyllës të vitit pandemik, vlera e eksportit drejt destinacioneve të ndryshme të botës të këtij grup – malli ishte 1.7 miliardë lekë. Ndërkaq, në muajin e parë të 2021- it, eksporti i këtij zëri arriti në afro 2 miliardë lekë.
Produktet kimike e plastike, si dhe artikujt dhe nën-artikujt e lëkurës kanë ndjerë lehtazi një rritje, në janar 2021 (krahasuar me dhjetor 2020).
Ngërçi, sikur të dhënat tregojnë, është hasur në 3 zëra të eksportit vendas. Këta të fundit, rezultojnë të kenë “sistem imunitar më të dobët”, krahasuar me zërat e lartpërmendur. Këtu flitet, sipas Instat, për ushqimet, lëndët djegëse dhe këpucët, prodhimet e drurit dhe letrës, si dhe materialet e ndërtimit dhe metalet.
Përkatësisht, eksporti i ushqimeve, pijeve dhe duhanit në dhjetor 2020 rezultoi 3.2 miliardë lekë, ndërsa në janar 2021, kjo vlerë zbriti në 2.5 miliardë lekë. Prodhime druri dhe letre ranë nga 744 milionë lekë eksporte (dhjetor 2020), në 618 milionë lekë (janar 2021).
Ndërkaq, grupmallrat materiale ndërtimi dhe metale, nga vlera 4.6 miliardë lekë e eksportit në dhjetor 2020, shënuan “mos-rikuperimin” në 4.2 miliardë lekë eksport, në janar 2021.
Megjithatë, në një panoramë të përgjithshme, nga 8 zërat kryesorë të eksportit vendas, 5 prej tyre kanë dëshmuar se po arrijnë të gjejnë rrugën e tyre të rikthimit në bazë, përpos vështirësive që pandemia vijon të krijojë.
Thënë ndryshe, është thuajse 60% e llojit të grupmallrave që po rikuperon gjurmët e pandemisë. Nga ana tjetër, 40% janë grupmallrat për të cilat do të flitet në muajt në vijim, në varësi të ecurisë që shifrat do të dëshmojnë.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.