Dita ndërkombëtare e mësuesit – Nikolla: Paga e mësuesve do të rritet në masën 40%
Mësuesit do të kenë mbështetje maksimale si në trajnime po ashtu edhe në anën financiare. Ministrja e Arsimit Sportit dhe Rinisë, Lindita Nikolla, gjatë një vizite në gjimnazin “Sinan Tafaj” në kryeqytet në kuadër të ditës ndërkomëtare të mësuesit, u shpreh se paga e mësuesve do të rritet në masën 40% .
“Padyshim mësuesit duhen mbështetur me paga. Ne jemi angazhuar të rrisim deri në 40% pagën e tyre. Mësuesit duhen mbështetur me mënyrën se si formohen dhe se si edukohen në fakultetet e edukimit”, tha Ministrja.
Nikolla u ndal edhe në akreditimin e universiteteve, ku siguroi se brenda vitit universitetet do të akreditohen në masën 100%. Kjo sipas Nikollës do të ndiqet edhe nga procese të tjera të shëndetshme për një arsim cilësor.
“Viti 2017 për herë të parë do të mundësojë 100% universitete të akredituara ndërkombëtarisht, pra universitete të cilat replikohen jo me standarde alla shqiptarçe siç jemi mësuar, por me standardet më të mira të Bashkimit Europian. Agjencia britanike që ka bërë të mundur këtë ka ofruar për çdo institucion tonin të arsimit të lartë një moment të rëndësishëm, të qëndrueshëm të standardeve me të cilët ata duhet të masin punën e tyre dhe kjo është shumë e rëndësishme për prindërit, për studentët, për shoqërinë shqiptare”, u shpreh Nikolla.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.