Diversifikimi i burimeve të prodhimit të energjisë – Balluku, në Ministerialin e Departamentit Amerikan të Energjisë: Aksion i përhershëm
Diversifikimi i burimeve të prodhimit të energjisë dhe siguria energjetike është një kërkesë dhe aksion i përhershëm për të gjithë infrastrukturën kritike në fushën energjetike”. Kështu e ka konsideruar ministrja e Infrastrukturës dhe Energjisë, Belinda Balluku eskperiencën shqiptare, në Ministerialin e Bashkëpunimit Transatlantik të Energjisë dhe Klimës të zhvilluar në Poloni, të organizuar nën kujdesin e Departamentit Amerikan të Energjisë.
Takimi kishte në fokus bashkëpunimin strategjik mes vendeve europiane dhe Shteteve të Bashkuara lidhur me masat e menjëhershme dhe afatgjata që duhen ndërmarrë për reduktimin e dëmit, që shkakton ndryshimin klimaterik, ku një faktor i rëndësishëm janë edhe një pjesë e konsiderueshme e mënyrave të prodhimit të energjisë. Aktualisht, mbi 95% e energjisë ne vendin tonë prodhohet nga burimet hidrike, çka bën që në periudha thatësirash të rriten shpenzimet për importin e energjisë. Ndërkohë që, për prodhimin e energjisë nga dielli në total kapaciteti i instaluar është 21 MW.
Ajo që pritet të sjellë një impakt të madh në këtë drejtim është ndërtimi i parkut fotovoltaik të Karavastasë, me një fuqi të instaluar prej 140 MW, si dhe ai i Spitallës me fuqi të instaluar 100 MW për të cilët janë finalizuar ankandet. Ndërkaq, potenciali i erës mbetet edhe i pashfrytëzuar në vendin tonë. Nisma e Bashkëpunimit Transatlantik të Energjisë dhe Klimës u krijua si një mundësi për rritjen e bashkëpunimit midis Shteteve të Bashkuara dhe vendeve të Evropës Lindore dhe Qendrore për sigurinë e energjisë dhe kalimin në ekonomi të pastra, neutrale ndaj karbonit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.