“Do rikthehet qetësia në Francë” – Maas: Franca njihet për kulturën e veçantë të protestave
Ministri i Jashtëm i Gjermanisë, Heiko Maas, tha se Franca njihet për “kulturën e veçantë të protestave” dhe se Gjermania nuk është e shqetësuar mbi zhvillimet e fundit që po ndodhin në vendin fqinj. Ai foli pas protestave kombëtare mbi rritjen e kostove të jetesës në Francë, që nxiti vandalizëm dhe trazira në të gjithë Parisin.
“Nuk jemi të shqetësuar. Sigurisht, ne po ndjekim zhvillimet e fundit me detaje. Franca njihet për kulturën e veçantë të protestave që ne po shohim sot. Por, pas gjithëçkaje që po dëgjoj, unë kam besim se situata atje do të qetësohet përsëri në të ardhmen e afërt” – u shpreh Maas. Revolta e “jelekëve të verdhë” e kapi presidentin francez Emmanuel Macron në befasi kur shpërtheu në datën 17 Nëntor.
Kjo përbën një sfidë të madhe për 40-vjeçarin që po përpiqet t’i bëjë ballë rënies së popullaritetit prej reformave të tij ekonomike, që sipas francezëve, favorizojnë njerëzit e pasur dhe bizneset e mëdha. Ministri gjerman shtoi se ka besim se në Francë do të rikthehet qetësia në të ardhmen e afërt.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.