Do të pakësohen festat zyrtare? – Debate në Kuvend, Alimadhi: PS trashëgimtare e komunizmit. Manja: Të ndërhyhet në ligj
Diskutimi i nismës së 22 deputetëve të opozitës parlamentare për të përshirë në listën e festave kombëtare 21 janarin e Kongresit të Lushnjës ka shkaktuar debate të ashpra në Komisionin Parlamentar të Ligjeve. Shkak u bë qëndrimi i relatorit të Projektligjit Alket Hyseni, sipas të cilit shtimi i një feste të re zyrtare do të sillte kosto financiare për buxhetin e shtetit, i cili aktualisht përballon 14 të tilla.
Sipas deputetit demokrat Myslim Murrizi, i cili edhe paraqiti propozimin në emër të 22 deputetëve, bëhet fjalë për një datë shumë të rëndësishme në historinë e vendit, ndërkohë që kostot nuk do të ishin të papërballueshme. Ndërkohë që tonet i ashpërsoi Deputeti i Ballit Kombëtar Adriatik Alimadhi, i cili akuzoi Partinë Socialiste si trashëgimtare të Partisë Komuniste.
Por kundër argumentit të kostove në buxhet doli edhe deputeti Socialist Bashkim Fino, sipas të cilit duhej bërë një vlerësim shkencor i peshës së kësaj feste në histori. Si deputet i Lushnjës, nga Bashkia dhe nga 12 mijë qytetarë të cilit ka ardhur fillimisht propozimi për këtë festë, Fino kërkoi më shumë kohë për vlerësimin e peshës historike të saj.
Kreu i Komisionit Ulsi Manja kërkoi në fund të diskutimeve që debati të zgjerohej në rivlerësimin e 14 festave kombëtare në vend, madje edhe ndryshimin e ligjit, duke lënë të hapur edhe heqjen e disa prej tyre apo shtimin e të rejave në bazë të vlerësimeve historike nga institucionet e specializuara. Sipas Manjës, jo çdo festë kombëtare duhet të jetë detyrimisht edhe ditë pushimi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.