Dobësia e prodhimit, Shqipëria e fundit në rajon
Dobësia e sektorit prodhues ngelet një dizavantazh i theksuar i ekonomisë shqiptare, edhe në raport me vendet e Rajonit. Sipas të dhënave krahasuese të Bankës Botërore, Shqipëria ka peshën më të ulët të industrisë prodhuese në strukturën e prodhimit të brendshëm bruto.
Kështu, për vitin 2015, vlerësohet se industria zinte 5.7% të prodhimit kombëtar të vendit, ndërsa, që nga viti 2011 e në vazhdim ka qëndruar në mënyrë konstante poshtë nivelit të 6%. Me këto shifra, Shqipëria renditet ndjeshëm mbrapa vendeve fqinje të Ballkanit Perëndimor.
Madje, për vitin 2015, Shqipëria ngeli mbrapa edhe në raport me Malin e Zi, ekonomi e mbështetur kryesisht te turizmi dhe shërbimet e lidhura me të. E sidoqoftë, për vitin 2015, edhe në Mal të Zi industria prodhuese zinte 6% të prodhimit kombëtar.
Për vendet e tjera, pesha e industrisë në ekonomi është ndjeshëm më e lartë. Kështu, në Kosovë dhe Maqedoni industria zë 12.3% të Prodhimit të Brendshëm Bruto, në Bosnje 14.1%, ndërsa në ekonominë serbe prodhimi ka peshë edhe më të lartë, duke arritur në afro 20% të prodhimit total.
Pas rënies së sistemit komunist, Shqipëria ka vuajtur për të ngritur një industri prodhuese të qëndrueshme dhe konkurruese. Fabrikat janë orientuar kryesisht drejt modelit fason, që konsiston thjesht në eksport të shërbimeve të punës me kosto të ulët. Me pak përjashtime, degët e tjera të inudstrisë përpunuese ende kanë përmasa modeste dhe ambicie të pakta për të konkurruar në tregjet e eksportit.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.