Dobësohet kërkesa për konsum – Çoçoli: Qeveria të ndërhyjë, të rritet qarkullimi i lekut

Ekspertët e ekonomisë komentojnë inflacionin e ulët në nivelin 1.3 për qind për muajin Qershor, duke e përkthyer në kërkesë të ulët për konsum dhe dobësi të ekonomisë.

“Kërkesë shumë e ulët. Pra konsumi i ulët që nënkupton se ekonomia nuk merr sinjale. Prodhuesit nuk marrin sinjale për të rritur kapacitete e prodhimit dhe shërbimit. Në këtë kuptim, jemi keq si ekonomi kjo edhe pse banka jonë e mban në nivel rekord koston e parasë, 1 përqind vetëm e vetëm që të nxisë kreditimin, konsumin. Te ne konsumi nuk nxitet për arsyen që e dijmë të gjithë, se kemi një klimë politike shumë problematike dhe e dyta ne mbajmë euron nëpër xhepa” shprehet Fatos Çoçoli.

Ndërsa kërkohet që qeveria të ndërhyjë për të rritur qarkullimin e lekut, pasi sasitë e mëdha të përdorimit euros,  vlerësohen si arsyeja kryesore.

“Ministria e Financave duhet të nxjerrë një rregullore ku të ndalohet përdorimi i euros dhe të nxitet përdorimi i monedhës kombëtare. Sepse duke nxitur përdorimin e monedhës kombëtare ne arrijmë të ulim përqindjen e interesit për kreditë dhe politika e Bankës qendrore përcillet më mirë në kanalet e ndryshme të prodhimit” shprehet ai.

Ndërkaq, inflacioni në këtë nivel shihet i lidhur drejtpërdrejt edhe me nivelin e ulët të rritjes ekonomike në 3-mujorin  e parë, prej 2.1 për qind.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.