Doganat, mbështetje nga qeveria e Francës – Analiza e riskut, pa hyrë mallrat në vend
Zëvendës Sekretari i Përgjithshëm i Sekretariatit të Detit, pranë kabinetit të Kryeministrit Francez, Admiral Patrick Auger, u prit sot në një takim zyrtar nga Drejtorja e Përgjitshme e Doganave, Belinda Ikonomi.
Rritja e bashkëpunimit në shkëmbimin e informacioneve ishte në fokus të bisedës, dhe të dy zyrtarët ndanë mendimin se do të ndikojë shumë në sigurinë e dy vendeve.
Ikonomi e informoi Admiralin mbi strukturën dhe objektivin e Doganës, e cila tashmë është përfshirë në operacione të ndryshme, jo vetëm në kontrollin e mallrave.
“Vëmendja tashmë është fokusuar shumë te siguria dhe shkëmbimi i informacionit mes vendeve tona, pikë kjo e rëndësishme edhe për Administratën Doganore”, theksoi Ikonomi.
Shqipëria ka një pozicion strategjik në Mesdhe, tha Admirali Auger, duke vlerësuar punën e bërë nga Administrata Doganore Shqiptare. Ai u shpreh, se edhe pse nuk jeni ende vend anëtar i BE, ne do përpiqemi që t’u përfshijmë në shkëmbimet e informacionit , pasi po synohet të ngrihet një strukturë e veçantë për Rojën Bregdetare Europiane, e cila do të fokusohet në uljen e nivelit të emigracionit të paligjshëm dhe trafiqeve.
Gjithashtu Admirali premtoi mbështetje për Doganat Shqiptare në ngritjen e sistemeve të reja të koordinimit midis atij portual dhe doganor. Duke iu referuar përvojës së këtij sistemi në Marsejë, implementimi i këtij sistemi do të bënte të mundur që analiza e riskut për kontenierë apo mallra të ndryshëm të bëhej ende pa hyrë në vend.
Gjatë vizitës së tij, Admirali Auger vizitoi Qendrën Ndërinstitucionale Operacionale Detare dhe Forcat Detare të Shqipërisë, ku u njoh nga afër me kapacitetet dhe funksionimin e këtyre strukturave, të cilave iu ofroi mbështetjen e tij.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.