Doganat, rekord të ardhurash në gusht – Çmimet dhe importet rritën perfomancën, 26 mln USD më shumë
Pavarësisht se vazhdojmë të jemi në pandemi për shkak të COVID-19, të ardhurat doganore në mujin Gusht, kanë arritur në nivelin më të lartë në 9 vitet e fundit. Sipas të dhënave zyrtare nga Drejtoria e Përgjithshme e Doganave, të ardhurat doganore në muajin Gusht 2021 janë realizuar në masën 17.3 miliardë lekë me një tejkalim prej 18% nga të ardhurat e planifikuara ose rreth 2.6 miliardë lekë më shumë. Ndërsa në krahasim me muajin gusht 2020, të ardhurat janë realizuar rreth 3.7 miliardë lekë më shumë ose me një rritje 27%.
Ndërsa të ardhurat në 8 mujorin 2021 janë realizuar në masën 119.3 miliardë lekë apo rreth 23.3 miliardë lekë më shumë se e njëjta periudhë e një viti më parë. Por çfarë ka ndikuar më së shumti në perfomancën e mirë të doganave, duke marrë parasysh edhe situatën e vështirë në të cilat ndodhet Shqipëria, rajoni dhe e gjithë bota? Sipas doganave rritja e të ardhurave është ndikuar në masën 78% nga rritja e sasive të importit dhe në masën 22% nga rritja e çmimeve, ndërsa theksohet se rritja e çmimeve në totalin e saj është amortizuar nga rënia e kursit të këmbimit me efekt negativ rreth 2 miliardë lekë.
Ndikimin më të madhe ka pasur TVSH, me një rritje prej 17.1 mld lekë më shumë, e cila vjen për shkak të rritjes së konsumit, çmimeve, importeve të mallrave, e ndjekur nga akciza me 5.2 miliardë lekë. Sa i takon karburanteve, në 8 mujorin 2021 regjistrohet sasia më e madhe e zhdoganuar në 6 vitet e fundit, në afro 424 mijë ton.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.