Doganë e përbashkët Shqipëri – Maqedoni, lehtësohen procedurat për tregtinë
Lehtësimi i procedurave doganore mes Shqipërisë dhe Maqedonisë ishin në fokus të takimit mes kryetarit të Kuvendit Gramoz Ruçi dhe homologut të tij maqedonas. Ndër të tjera Ruçi dhe Xhaferi në konferencën e përbashkët për shtyp i janë referuar edhe aktualitetit në Shqipëri sa i përket zgjedhjes së Kryeprokurorit të Përgjithshëm.
“Ramë dakord që të dyja palët, të dy parlamentet tona, për adresimin e çështjeve të mbetura pezull, marrëveshjet e mëparshme midis institucioneve të shtetit maqedonas dhe atij shqiptar siç është ai i problemit të adresimit të ujërave dhe ndikimi i tyre në mjedis; siç është rishikimit të ujërave kufitare; siç është ai i lehtësimit të qarkullimit të mallrave dhe të njerëzve dhe për t’u ardhur në ndihmë këtyre ramë dakord që rikthimi i pikës kufitare dhe doganore të Qafë-Thanës të jetë pikë e përbashkët doganore dhe kufitare me qëllim që t’u vijë në ndihmë qytetarëve maqedonas dhe atyre shqiptarë, ashtu sikurse inkurajuam riaktivizimin e pikës kufitare të Zhapishtës me një regjim 24 orësh, si edhe rihapjen e linjës së trageteve Ohër – Shën Naum – Pogradec veçanërisht për periudhën e verës, apo problemi tjetër i certifikimit dhe njohjen e ndërsjellët të standardeve, veçanërisht për produktet bujqësore dhe elektorale”, u shpreh Ruçi.
“Unë, në cilësinë e Kryetarit të Kuvendit, do të përpiqem që në kuadër të mundësive të mia të jap kontributin maksimal që bashkëpunimi mes dy vendeve tona të thellohet edhe më shumë në të gjitha sferat. Siç e përmenda më parë, si shtet jemi të vendosur të përqendrohemi në rrugëtimin e shoqërisë qytetare, të bazuar mbi mundësitë e barabarta të të gjithëve, me theks të veçantë në marrëdhëniet ndëretnike dhe duhet ta dimë që shumëllojshmëria na bën më të fuqishëm e jo më të dobët.
Në fund, bëj ftesë për bashkëpunim më të thellë, qoftë edhe përmbajtjesor në të gjitha sferat e mundshme të bashkëpunimit duke iu referuar obligimeve dhe të drejtave tona institucionale, në kuptimin e sendërtimit të mirëqenies dhe bashkëpunimit të qytetarëve tanë dhe vendeve tona mike”, u shpreh Xhaferi.
Të dy vendet do të intensifikojnë bashkëpunimin mes tyre, ndërkohë që Shqipëria do të vijojë të mbështesë integrimin e Maqedonisë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.