Dokument identifikimi për punonjësit e naftës e gazit/Ngrihet komisioni i posaçëm për dhënien e statusit
Personat që kanë punuar në industrinë e naftës dhe të gazit do të duhet që të kalojnë “filtrin” e një komisioni të posaçëm që të mund të përfitojnë statusin e veçantë që mundëson edhe trajtimin e tyre financiar.
Vendimi që tashmë ka marrë fuqi ligjore parashikon ngritjen e një komisioni të posaçëm për pajisjen me dëshmi zyrtare identifikuese për punonjësit e industrisë së naftës dhe të gazit. Ky komision do të ngrihet pranë ministrisë së Energjisë dhe do të ketë në përbërje 5 përfaqësues nga ministria përgjegjëse për industrinë e naftës dhe të gazit, 1 përfaqësues nga ministria përgjegjëse për çështjet sociale dhe 1 përfaqësues nga Ministria e Financave. Kryetari i Komisionit është një nga përfaqësuesit e ministrisë përgjegjëse për industrinë e naftës dhe të gazit.
Çdo muaj, komisioni do të mblidhet për të shqyrtuar kërkesat e aplikantëve.
Të drejtën për marrjen e statusit të punonjësit të industrisë së naftës dhe gazit e kanë naftëtarët dhe ish-naftëtarët që plotësojnë kushtet në përputhje me ligjin nr. 8/2017, “Për statusin e punonjësve të industrisë së naftës dhe të gazit”. Aplikuesi duhet të paraqesë në ministrinë përgjegjëse për industrinë e naftës dhe gazit, pranë Komisionit të ngritur për këtë qëllim, dokumentacionin e mëposhtëm:
-Kërkesën për pajisjen me dëshmi zyrtare identifikuese
-Fotokopje të noterizuar të një dokumenti identifikues të aplikuesit
-Fotokopje të noterizuar të librezës së punës ose të librezës së pensionit
-Vërtetimin e posaçëm zyrtar si dhe dy fotografi në format dokumenti.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.