Dokumentet e pronësisë – Shkreli në Himarë: Ky projekt do të vazhdojë dhe nuk ka kthim mbrapa
Përfaqësues të Ministrisë së Infrastrukturës dhe Energjisë, Bashkisë së Himarës, Hipotekës së Vlorës dhe ALUIZNI-t ishin në Himarë në kuadër të procesit të bisedimit me banorët që pretendojnë titujt e pronësisë në objektet që preken nga projekti i rikualifikimit urban.
Kryetari i Bashkisë, Jorgo Goro tha se strukturat shtetërore po bashkëpunojnë për rishikimin e të gjithë dokumentacionit për pronarët që preken nga ky projekt.
“Ne si bashki, gjithë struktura jonë, është e angazhuar dhe është në dispozicion të qytetarëve, për ti orientuar se çfarë dokumentacioni do të kenë ata në mënyrë që ky projekt shumë i rëndësishëm për bashkinë tonë por dhe për vet qytetarët të finalizohet me sukses në interes të tyrin dhe në interesin e përgjithshëm”, tha Goro.
Ndërkohë, zv. Ministri i Infrastrukturës dhe Energjisë, Artan Shkreli i cili ishte i pranishëm, u shpreh se Himara është shumë mbrapa me hedhjen e të dhënave në sistem për tokën. Sipas tij, ky do të shërbejë edhe si një projekt pilot për regjistrimin e pronave të njerëzve që kanë pretendime. Ai u bëri thirrje banorëve që të paraqesin dokumentet në ambientet që bashkia do t’u mundësojë.
“Një gjë është e qartë dhe e sigurtë që ky projekt do të vazhdojë dhe nuk ka kthim prapa të projektit”, theksoi Shkreli.
Shkreli u zotua para qytetarëve se projekti do të vazhdojë në formën që është miratuar nga këshilli Kombëtar i Territorit dhe se qeveria shqiptare i ka marrë të gjitha masat për që ky proces të shkojë deri në fund.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.