Dollari arrin në një ndalesë – Rritja spektakolare e këtij viti pritet të përmbyset në 2019
Dollari ka pasur një rritje të pakrahasueshme kundër valutave kryesore këtë vit, por sipas një sondazhi të analistëve nga Reuters, valuta pritet të humbasë vrulle në vitin 2019, prej shqetësimeve mbi ngadalësimin e ekonomisë amerikane.
Dollari pritet ta mbyllë 2018-ën me rritje kundër valutave kryesore, megjithatë, ka qenë nën presion së fundmi që kur kryetari i Rezervës Federale, Jerome Powell, tha se normat e interesit janë pranë nivelit neutral. Në sondazhin e fundit të Reuters, të ndërmarrë në periudhën 28 Nëntor-5 Dhjetor, dollari u projektua në rënie kundër valutave kryesore në një afat 1-vjeçar. Euro nga ana tjetër, pritet të arrijë në 1.20 dollarë, në rritje me 6% nga 1.13 që ishte ditën e Mërkurë.
Valuta e gjelbër gjendet gjithashtu përballë limiteve, duke marrë parasysh se spekulimet në favor të dollarit qëndrojnë në nivelin më të lartë që prej Dhjetorit 2016. “Sheshimi” i kurbës së yield-it në SHBA, një fenomen ku interesat afat-gjatë bien më shpejtë se sa ato afat-shkurtër, qëndron në nivelin më të ulët në 1 dekadë, në 13 pikë bazë apo 0.13%. Kjo ka shtuar shqetësimet për një recesion në ekonominë më të madhe në botë.Përmbysja e yieldit 10-vjeçar kundrejt atij 2-vjeçar, që ndodh kur obligacionet 10-vjeçare kanë interes më të ulët krahasuar me titujt 2-vjeçar, ka paraprirë gjithnjë recesion në Shtetet e Bashkuara në 50 vitet e fundit.
Titujt e kapitalit në të gjithë botën dhe dollari janë cenuar gjithashtu nga pritshmëritë se Rezerva Federale mund të ketë arritur fundin e ciklit tkurrës monetar. Nga ana tjetër, Paundi u projektua në rritje me mbi 7%, në 1.37 dollarë në 12 muaj, nga 1.28$ që ishte të Mërkurën.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.