Donacionet në vendin e duhur, Rama: “Ndërtojmë akademinë e transparencës”, BE-ja do dërgojë ekspertë për monitorim

Në konferencën e përbashkët për shtyp të mbajtur së bashku me presidenten Komisionit Europian, Ursula Von der Leyen, kryeministri Rama u shpreh se fondet e mbledhura në Konferencën e Donatorëve ditën e sotme do të kalojnë një lupë transparence.

Sipas tij është pikërisht Amerika që ka kërkuar nga qeveria shqiptare për të ndërtuar “Akademinë e Transparencës”, një institucion “, i cili do të monitorojë të gjithë procesin e rindërtimit. Por jo vetëm kaq, kjo akademi me standarde monitoruese amerikane, do të shërbejë edhe në vijim në Shqipëri, në procese të rëndësishme publike që duan ‘syrin’ e mirë vëzhgues, siç janë tenderët dhe prokurimet publike.

Presidentja e KE-së Ursula von der Leyen gjithashtu u shpreh se Europa do të dërgojë ekspertët e saj dhe se është nënshkruar një marrëveshje me kryeministrin Rama, e cila do të mundësojë ndjekjen e të gjithë standarteve të rindërtimit dhe që do të kërkojë transparencë:

“Ne do të kemi një marrëveshje me qeverinë e Shqipërisë. Folëm për këtë gjë, për t’u siguruar që parimet bazë të rindërtimit të respektohen. Ne jemi të interesuar për progresin e vendit, dhe unë kam ofruar gjithë mbështetjen time që ta kalojmë këtë proces së bashku. Është në interesin tonë të përbashkët që Shqipërinë ta mbajmë sa më pranë BE-së. Ne kemi punuar shumë për të shtruar rrugën që këtë vit të arrijmë suksesin që dëshirojmë. Ne do të përcaktojmë parimet kyçe të transparencës. Të dy duam që kjo shenjë e jashtëzakonshme me popullin shqiptar, të investohet në mënyrën e duhur, transparente, jemi të gatshëm të dërgojmë ekspertët tanë për ta zbatuar në mënyrën e duhur. Këtë marrëveshje do ta nënshkruajmë së bashku”, tha presidentja e KE-së Ursula von der Leyen.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.