Dorëhiqet Shinzo Abe – Kryeministri më jetëgjatë i Japonisë largohet për arsye shëndetësore

Shinzo Abe, kryeministri më jetëgjatë i Japonisë do të japë dorëheqjen, bëjnë me dije mediat kryesore të vendit. Sipas zërave shumë pranë kryeministrit, ai tashmë i`a ka komunikuar vendimin partisë së tij. Dorëheqja lidhet me një sëmundje kronike nga e cila vuan.

Gjatë kohëve të fundit kishin dalë zëra të ndryshme sa i përket gjendjes shëndetësore të kryeministrit, sidomos pas vizitave të tij të shpeshta në spital. Abe, 65 vjeç, është në pushtet që prej vitit 2012, paçka se ky nuk ishte mandati i tij i parë. Ai shërbeu edhe një mandat të parë, 1-vjeçar, për t`u dorëhequr më pas në vitin 2007. Kryeministri japonez njihet gjerësisht për diplomacinë e tij.

Që prej rikthimit, ai ka drejtuar partinë e tij drejt 6 fitoreve kombëtare në zgjedhje, duke i mbijetuar edhe skandaleve të ndryshme. Ai do të mbahet mend edhe për faktin se rriti ndjeshëm shpenzimet për mbrojtjen si dhe gjeti aleatë të ndryshëm në Azi për të ndalur disi ekspansion ekonomik dhe ushtarak të Kinës. Vetëm pak kohë më parë, Abe theu rekordin si kryeministri më jetëgjatë në detyrë në Japoni, rekord ky që më parë mbahej nga paraardhësi i tij, Eisaku Sato, gjysmë shekulli më parë. Pas dorëheqjes së tij, në rast se gjendja shëndetësore do ta pamundësojë qëndrimin në detyrë, pritet që detyrën e kryeministrit, përkohësisht ta marrë, zv.kryeminsitri, njëkohësisht ministër i financave, 79 vjecari, Taro Aso.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.