Dosjet për tenderat – KPP “mbytet” në ankesa në 5 muajt e vitit 2017

Komisioni i Prokurimit Publik është mbytur nga dosjet e ankimimeve në pesë muajt e parë të këtij viti. Të dhënat e fundit tregojnë se muaji me më shumë dosje të kundërshtuara është Marsi lidhur me faktin që edhe shpallja e procedurave është më e lartë në këtë muaj, kurse ai me nivelin më të ulët të ankesave është Janari, kjo sërish e lidhur me faktin e kufizimeve që sjell fillimviti.

Por si paraqitet situata muaj pas muaji. Në janar pranë Komisionit të Prokurimit Publik janë dorëzuar 58 ankesa, në muajin shkurt 103 ankesa, në Mars 216 ankesa në Prill 173 ankesa dhe në maj 115 ankesa. Totali i ankimimeve kap numrin 665 ankesa.

Gjatë këtij viti ankesat që kanë mbizotëruar janë të njëjta me tendencën e dy viteve të mëparshme që lidhet me sigurinë fizike ofruar nga policia private, por nuk kanë munguar edhe dosje të rëndësishme koncesionesh për të cilat Komisioni i Prokurimit Publik në disa raste ka kërkuar rikthimin e tyre për korrigjim nga autoritetet kontraktore dhe në raste të tjera ka urdhëruar vijimin e procedurave normalisht.

Komisioni ka tagrin të kthejë një procedurë në momentin që vëren parregullsi dhe kur ankimimi nuk është marrë parasysh nga institucioni përkatës në afatin 10 ditor të shqyrtimit që përcakton ligji.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.